Diario Vasco

Gimnasia erakustaldiak eta haurren jokoek eman zieten hasiera jaiei

Elementu ezberdinekin sortutako koreografiak eskaini zituzten.
Elementu ezberdinekin sortutako koreografiak eskaini zituzten. / ARGAZKIAK YARZA

Txupinazoarekin hasi ziren atzo goizean Elduaingo 2016ko jaiak. Eguraldi euritsuarekin argitu bazuen ere egunak, jai giroan murgildu ziren herrian. Arratsaldean, Nagorek, Garazik, Anek eta Maialenek gimnasia erritmiko emanaldi berezia eskaini zuten pilotalekuan abesti ezagunen erritmoan ariketak eginez. Aroa, pilota eta mazak bezalako elementu ezberdinak erabiliz, ordubeteko saioa eskaini zuten. Ikuslez bete zen frontoia eta guztiek txaloak eskaini zizkieten parte hartzaile gazteei prestatutako emanaldiagatik.

Ondoren, haurrentzako jolasak antolatu ziren. Aulki jokoa, taldekako zaku karrera edota koilararekin arrautza eramatea, izan ziren jolasetako batzuk. Haur ugari animatu ziren jokoetan parte hartzera. Amaieran, guztientzako txokolate beroa banatu zen.

Gaurko egitaraua

Goizeko 11:00etatik aurrera haurrentzako eskulan eta gazteentzako graffiti tailerrak antolatuko dira eta 12:30ean toka lehiaketa herrikoia izango da plazan. Jarraian, herri bazkaria izango da frontoian eta arratsalde guztian puzgarriak egongo dira haurrentzako zein helduentzako. Gauerdian Ingo al deu? taldearen dantzaldia hasiko da.