Diario Vasco

Gaur hasi eta igandera arte jaiak izango dira Lizartzan

  • Gauerdian botako da txupinazoa eta helduen danborrada aterako da

Lizartzako jaiak iritsi dira berriro ere urte beteren ostean. Gaur osteguna, hasiko dira eta igandera arte luzatuko dira. Ostegunean Lizardi txistulari taldearen dianak iragarriko du jaien hasiera 9:30etik aurrera. 13:30ean helduen harrera eta bazkaria egingo da eta arratsaldeko 19:00etan kalejira Karobitxulo taldearekin. Ondoren, haurren danborrada egingo da eta jarraian herri afaria izango da. Gauerdian botako da txupinazoa eta helduen danborrada aterako da. Goizeko 1:00ean Zesuma taldearen kontzertua hasiko da.

Ostiralean, Andre Mariaren eguna ospatuko da. Goizeko 10:00etan Karobitxulo taldeak diana joko du eta 11:30ean haurrentzako jolasak antolatuko dira. Arratsaldeko 13:30ean, haurren bazkaria izango da eta 16:00etan puzgarriak izango dira eta amaieran apar festa izango da.

Arratsaldeko 19:00etan bertso poteoa izango da Oihana Iguara eta Mikel Artola bertsolariekin eta 23:30ean Laket taldearekin dantzaldia hasiko da.

Hurrengo egunean, larunbatean, Lizardi txistulari taldeak diana joko du goizeko 10:00etatik aurrera eta 11:00etan ur jolasak antolatuko dira. 12:30ean poteoa hasiko da Lizartzako gaiteroekin eta 14:00etan bazkaria izango da. Bazkalondoren DJ Jotatxorekin dantzaldia izango da eta 18:00etan dantza-soka dantzatuko da.

Ondoren, sagardo dastaketaizango da. Iluntzeko 20:30ean kalejira egingo da, 22:30ean Dj-a izango da eta 00:30etik aurrera Unsainekin erromeria.

Jaien azken eguna igandean izango da. Goizeko 9:30ean Lizar-tzako gaiteroekin diana izango da eta ondoren haurren arteko pilota partiduak jokatuko dira. Jarraian, Otsolar dantza taldeak emanaldia eskainiko du plazan.

Arratsaldean, mus txapelketa jokatuko da 17:00etatik aurrera eta 17:30etan Bazen Behin Klown taldeak Pituxa Klowntukontari emanaldia eskainiko du. Ondoren, guraso elkarteak antolatutako pintxo lehiaketa egingo da Isk&Bila txarangak girotua.