Diario Vasco

Euskal jantzien erakusketa ikusgai dago Ardixarra etxean

Euskal jantzien erakusketa ikusgai dago Ardixarra etxean
  • Urriaren 15ean izango da aurten Dantza Txapelketa eta izena emateko epea dagoeneko zabaldu da

Euskal jantzien erakusketa ireki zen atzo Ardixarra etxean. Euskal Herriko Dantza Solteko Txapelketak 40. urteurrena betetzen du aurten eta hainbat ekintza antolatu dira motibo horrekin. Ekitaldi horien barnean kokatu behar da Errenteriako Iraultza Dantza Taldearen bidez antolatu den erakusketa hau. XVI eta XIX. mende bitarteko arropak dira eta Ramon Garcia diseinatzaileak prestatu ditu. Eñaut Telleria alkateak, Iosune Arrondo udal teknikariak eta turismo bulegoko Izarra Urdalletak azaldu zuten erakusketa, bi hilabetez egongo dena jendaurrean, turismo bulegoaren ordutegiarekin: Ostiraletan 17:30etik 19:30era, eta asteburu eta jai egunetan 11:30etik 13:30era goizez eta 16:30etik 19:30era arratsaldez.

Bestalde, urriaren 15ean izango da aurtengo txapelketa eta zabalik dago jada izena emateko epea dantzarientzat. Aurretik, irailaren 17 eta 18an, Goierriko Erromeri Bira ospatuko da, Kantu Jira eta Jubilatuen Egunarekin batera. Urriaren 15ean, egun guztian zehar dantza giroa egongo da herrian; 11:30ean plazan topaketa nagusia izango da eta Azpilla Dantza Taldearen erronka izango da Seguran inoiz ezagutu den polka jendetsu eta erraldoiena egitea.