Saguaren isatsa

Ezagutzen nautenek, gaiaz aritu naizenetan entzuteko pazientzia izan dutenek batik bat, badakite ezinezkoa ezinezko metafisikoa, alegia iruditzen zaidala gaztelaniazko edo gaztelania nagusi duten hedabideetan euskara duintasunez txertatzea. Beharrezkoa ote den, baditut euskara hutsezko eskaintza handitu eta heldu ahala areagotuz joan zaizkidan zalantzak. Edonola ere, posible balitz aurkitua izango luke baten batek formula baina, dakidala, emaitza oso diskretuak izan dituzte orain arteko saioek. Aristotelesek berak ere erraz antzean definitu zuen ezinezko metafisikoa baina, gogotik saiatu arren, ez zuen aurkitu beruna urre bilakatuko zuen harria.

Azkenaldian, nagusiki gaztelaniazkoak diren beste hedabide batzuen bertsio digitalak bezala, Jaurlaritzak propio sortutako diru-laguntzen bultzadapean, hau ere hasi da euskaraz idatzitako testuei emandako tartea zabaltzen. Berandu, nekez, poliki, haizearen kontra... Guztiz apal, ikasteko irakasteko baino askoz ere gehiago daukagula jakinik. Zeren eta, beste gauza askoren artean, euskarazko hedabideek horizontalek, bertikalek eta diagonalek egin duten bide miresgarriaz eta lehoien ondoan sagu ziruditenen lorpenez jabetzeko balio baitu saioak. Eta lehoia izatera ohituta dagoenarentzat ez da bizi-irakaspen makala noizean behin saguaren isats bilakatzea.