Suplemento Publicitario Sobre Ciberseguridad

“Zibersegurtasuna lehiakortasun faktore bilakatu da”

Ainhoa Aizpuru, Ekonomia Sustapeneko diputatua/
Ainhoa Aizpuru, Ekonomia Sustapeneko diputatua
Ainhoa Aizpuruk, Ekonomia Sustapeneko, Landa Inguruneko eta Lurralde Orekako diputatuak, argi dauka Gipuzkoak Zibersegurtasun Industrialeko Zentro Aurreratu bat sortzeko baldintza ezinhobeak eskaintzen dituela
EL DIARIO VASCO

Zentroaren ezaugarriak kontuan izanda, Zuatzuko parkeak baldintza ezinhobeak eskaintzen dituela dio Ainhoa Aizpuruk, Ekonomia Sustapeneko, Landa Inguruneko eta Lurralde Orekako diputatuak.

Zergatik aukeratu duzue Zuatzu Gipuzkoako Zibersegurtasun Industrialeko Zentro Aurreratuko egoitza gisa?

Aukera ezberdinak sakon aztertu ostean, ondorioak garbiak izan dira: Zuatzuko parkeak baldintza ezinhobeak eskaintzen ditu, zentroaren ezaugarriak kontuan izaten baditugu. IKTen eta alor digitalean puntakoak diren enpresak biltzen ditu, zenbait zibersegurtasuneko enpresa ere bertan kokatuta daude, eta gainera konektibitate aldetik baldintza oso onak eskaintzen ditu. Bertatik igarotzen da baita banda ultra azkarreko konexio garrantzitsu bat. Gainera, aipatzekoa da Donostiako Udalak, alkatea buru, gai honetan izan duen papera eta azpiegitura hau Donostiara erakartzeko ahalegina. Donostian ezagutza aurreratua pilatzen duten enpresa eta berrikuntza gune ugari daude, eta horrek inguru egokia ezartzen du horrelako zentro baterako.

Industriak lurraldeko BPGan duen pisua kontuan hartuz, ezinbestekoa da halako azpiegitura bat edukitzea Gipuzkoan?

Gipuzkoak Estatu mailan zibersegurtasunaren alorrean punta-puntako enpresak ditu. Gainera, lurraldeko industria digitalizazioaren aldeko apustu sendoa egiten ari da eta, hori gutxi balitz, makina erramientaren sektoreak garrantzi berezi du gure lurraldean –hain justu, gainontzeko industrietarako makinak egiten dituen sektorea–. Gipuzkoak, beraz, baldintza ezinhobeak eskaintzen ditu halako zentro bat sortzeko. Horrez gain, ikusita zibersegurtasunaren alorra zenbateko garrantzia hartzen ari den –ez bakarrik erasoek sor dezaketen galerengatik, baizik eta lehiakortasunaren ikuspegitik–, gure lurralderako hil ala bizikoa da desafio honi berme guztiekin aurre egitea. Enpresa industrial guztiek, bereziki txiki eta ertainek, errealitate honi aurre egin diezaioten lagundu behar dugu.

“I+G+bko laborategian lurraldeko enpresek beren produktu eta zerbitzuak testeatu ahalko dituzte” zerbitzuak

“Digitalizazioak dakartzan arriskuei aurre egiten lagundu nahi genieke Gipuzkoako enpresei” laguntza

Gure industriaren lehiakortasuna bultzatzeko lehen mailako aktibo bilakatu daiteke zibersegurtasuna?

Zalantzarik gabe, zibersegurtasuna lehiakortasun faktore bilakatu da. Horregatik, hasiera-hasieratik, lehen esandako arrazoiengatik, industriara bideratutako zibersegurtasun zentro batean jarri du jomuga Gipuzkoako Foru Aldundiak. Ez bakarrik digitalizazioak arriskuak dakartzalako eta horiei aurre egin behar zaielako, baizik eta gure industria ehunari aukera berriak ekar diezazkiokelako ere bai. Eta hor ere lagundu nahi genieke enpresei.

Zer nolako erantzuna jaso duzue inguruko enpresengandik? Interesez jaso dute zentroa martxan jartzeko proiektua?

Etengabe kontaktuan izan gara lurraldeko zibersegurtasun enpresekin eta alor honi lotutako jakintza guneekin, eta interes handiz ari dira jarraitzen proiektuaren garapena. Horren lekuko, zibersegurtasun enpresekin elkarlanean, dagoeneko martxan dago programa pilotu bat; gure enpresa industrialek zibersegurtasunaren ikuspegitik dituzten egoera eta hutsuneak aztertzen ari gara. Gure asmoa baita zentroa eragile ezberdinen arteko kolaborazio gune izatea, non enpresa txiki eta ertainei lagunduko zaien zibersegurtasuna garatzen bere sistemetan eta gai honi lotutako berrikuntza, talentua, sentsibilizazioa eta formakuntza landuko den. Hor oso garrantzitsua izango da ehun industrialaren beraren partaidetza. Eta horregatik zentroko erabaki guneetan leku bat izan dezaten saiatuko gara. Elkarlana izango du oinarri.

Zer nolako zerbitzuak eskainiko dizkie enpresei?

Berezitasun nagusia, hain justu, zentroaren jomuga industrial hori izango da. Horrek esan nahi du bere espazio zentrala I+G+bko laborategia izango dela. Bertan lurraldeko enpresek beren produktu eta zerbitzuak testeatu edo frogatu ahalko dituzte, segurtasun zertifikazioak eskainiko dituzte eta ikertu ahal izango dute. Espazio horrek, gainera, lurraldeko enpresen eta teknologia zentroen artean kolaboraziorako dinamikak sorraraziko ditu. Horrez gain, zibersegurtasunaren alorrean ekintzailetasuna zein formazio espezializatua eskaintzeko gunea izango ditu.

Sektoreko eragile eta enpresen arteko elkarlanerako nolako aukerak eskainiko ditu zentroa abiarazteak, tokiko gunean nahiz Estatu zein nazioarte mailan?

Dagoeneko nazioarteko sareekin komunikatzeko bideak zabaltzen dihardugu. Aldundia Europako Zibersegurtasun Elkarteko kide da dagoeneko, esate baterako. Nire ustez, zentroak potentzial handia izango du elkarlanaren ikuspegitik. Bertako enpresak eta gure industria nazioartean zibersegurtasunaren alorrean sortzen ari diren dinamika eta sareetan txertatzeko balioko du, nazioarteko ezagutza eta esperientzia aurreratuenak bertara gerturatzeko, alegia. Eta aldi berean, lankidetzatik abiatuz, ezagutza berria sortu eta gure enpresetan saretzen lagunduko du.

Contenido Patrocinado

Fotos

Vídeos