Zortzi urterekin eskuratzen dute aurreneko mugikorra

Duela sei urte, 11 urterekin jasotzen zuten aurreneko mugikorra./FOTOLIA
Duela sei urte, 11 urterekin jasotzen zuten aurreneko mugikorra. / FOTOLIA

UPV/EHU kide den EU Kids Online taldeak Europa eta Latinoamerikako zenbait adituren ekarpenak biltzen dituen liburua aurkeztuko du datorren astean, non "haurtzaro konektatuaren" arriskuez ohartarazten den

Zein da haur baten eskuetan telefono mugikor bat jartzeko adin egokia? Adin txikiko seme-alabak dituzten guraso guztiek egin behar diote aurre galdera horri gaur egun eta, are gauza konplikatuagoa, erantzun bat eman behar diote, ume-umetan hasten baitira sakelako telefonoaren eske.

Iaz INE Espainiako Estatistika Institutuak zabaldu zuen datuaren arabera, 10 urtetik aurrera modu nabarmenean egiten du gora eskukoa duten haurren kopuruak, eta ia erabat orokortuta dago 15 urtekoen artean, %6 txiki batek izan ezik gainerako guztiek baitute telefonoa. 10 urtekoen artean %25ek dute bakarrik telefonoa; %45,2k 11 urtekoen artean; %75k 12koen artean; %83k 13koen artean eta %93k 14koen artean.

Datu horiek argi uzten dute 10 urte betetzerako haurren laurden bat telefono mugikor baten jabe dela. Muturrerago eramango du datua datorren astean Madrilen UPV/EHUko EU Kids Online ikerketa taldeak aurkeztuko duen 'Entre selfies y whatsapps. Oportunidades y riesgos para la infancia y adolescencia conectada' liburuak. Europa eta Latinoamerikako adituen lanak biltzen dituen liburuaren arabera, neska-mutikoek zortzi urterekin eskuratzen dute aurreneko telefono mugikorra.

Hezkuntza komunitateari, familiei eta adin txikikoen segurtasunarekin zerikusia duten eragile guztiei zuzendutako liburuak 17 artikulu zientifiko biltzen ditu, eta "gaur-gaurko ebidentzia fidagarrietan" oinarritutako diagnostikoa eskaintzen du. Eta ebidentzia horietan oinarrituta "haurtzaro konektatu" goiztiarraren arriskuez ohartaraziko dute.

Hiru urte lehenago

Izan ere, gero eta goiztiarragoa baita mugikorrarekin batera datozen aukera eta arriskuekiko esposizioa. Orain dela sei urte, 10 urterekin sartzen ziren aurrenekoz neska-mutikoak interneten, eta 11 urterekin erosten zieten lehenengo mukigorra. Sei urteren buruan, Espainian bederen, hiru urte lehenago hasten dira tresna horiek baliatzen.

Zorionez, "interneten, telefonoen eta tableten erabilera gero eta goiztiarragoa bada ere, arriskuak ez dira areagotu neurri berean", nahiz eta teknologia berriei lotutako fenomenoren batzuk hedapen azkarra izan duten. Hala, 9 eta 16 urteko erabiltzaileen artean bikoiztu egin dira bullying kasuak. 2010ean %15ek aitortu zuten jazarpen motaren bat jasaten zutela, cyberbullying delakoa barne. Liburuan jaso den ikerketa baten arabera, %31ra heldu da kopuru hori. Era berean, izaera sexuala duten mezuak jaso dituzten adin txikikoen kopurua izugarri hazi da azken urteetan: hamarretik hiruk esan dute jaso izan dituztela horrelako mezuak.

Dozena bat unibertsitatetako adituen lanak bildu dituen liburuak atal berezituak eskaintzen dizkie gai nagusiei. Interneteko arriskuak, sextingaren egiazko eragina, neska-mutikoek cyberbullyingari aurre egiteko modua, gurasoen bitartekaritza edo ikastetxeen jarrera aztertzen dira, beste zenbait gairen artean.

Datorren asteartean Europako Batzordeak Madrilen duen aretoan egingo den aurkezpenean parte hartuko dute, Dimitri Barua EBren Espainiako eledunarekin batera, Maialen Garmendia UPV/EHUren EU Kids Online ikerketa taldeko zuzendaria eta argitalpenean parte hartu duten UPV/EHUko irakasle Estefanía Jimenez eta Carmelo Garitaonandiak.

Kide nagusiak UPV/EHU eta LSE (London School of Economics) dituen EU Kids Online sareak 30etik gora herrialdetan du presentzia, eta 100 bat aditu biltzen ditu. 2006 urteaz geroztik ari da Europako Batzordearen 'Safer Internet' programaren laguntza jasotzen, eta egiten duen lanak eragin handia du Europako Batasunaren politiketan.

Temas

Euskera

Contenido Patrocinado

Fotos

Vídeos