Zientzian Ekialdearen eta Mendebaldearen arteko lankidetza sustatzeko ekimen bat sinatu dute ehundik gora ikertzailek

Ikerbasque-ko ikertzailea, laborategian/Michelena
Ikerbasque-ko ikertzailea, laborategian / Michelena

Sinatzaileen asmoa da zientziaren bidez kulturen arteko zubiak eraikitzea, horrela mundua konektatuago egon dadin, "eta guztiok batera helburu baten alde lan egin ahal izateko"

DV

Ekialde Ertaineko eta Mendebaldeko kulturen arteko lankidetza sustatzeko "alegatua" idatzi dute, eta jada mundu osoko 22 herrialdetako 82 ikerketa gunetako 122 ikertzailek sinatu dute 'Neuron' aldizkariko 'The Science Bridge' artikulua. Besteak beste, zientziaren bidez mundu hobea eraikitzea eta giza gaixotasunak desagerraraztea ditu helburu ekimenak.

Sinatzaileen artean Euskal Herriko Unibertsitateko (EHU) zenbait ikertzaile daude, eta orain arte, mundu osoko 200 pertsonak babestu dute artikulua, guztiak zientziaren arlokoak. Guzti horien artean 29 Nobel saridun daude.

Olga Peñagarikano EHUko Farmakologia Saileko irakasle eta ekimenaren sinatzaileetako batek adierazi duenez, "ekimenaren bultzatzailea Mazahir Hasan Ikerbasqueko irakaslea izan da, Achucarro Basque Center for Neuroscience zentrokoa, eta sinatzaileen asmoa da zientziaren bidez kulturen arteko zubiak eraikitzea, horrela mundua konektatuago egon dadin, eta guztiok batera helburu baten alde lan egin ahal izateko".

«Zientzia oso egokia da kultura desberdinetako jendea lotzeko eta batzuek eta besteak hobeto ulertzeko»

Ildo berean, Mazahir Hasan artikuluaren egileak zehaztu duen moduan, "zientziaren arloan diharduen jendea ezagutzaren bilatzaile izanik gizateriaren enbaxadore da, eta beren esku dago mundua bateratzeko aukera, kultura desberdinek eta nazioen arteko lankidetzak sormenerako eskaintzen duten aukeraz baliatuz, eta hartara ahalegina eginez giza gaixotasunak desagerrarazteko".

AEB, Alemania, Australia, Bahrain, Egipto, Erresuma Batua, Espainia, Frantzia, Iran, Irlanda, Israel, Italia, Japonia, Maroko, Mexiko, Norvegia, Qatar, Herbehereak, Pakistan, Suedia, Suitza eta Turkiako hainbat ikerketa gune eta unibertsitatetako ikertzaileek babestu dute ekimena.

Hobeto ulertzeko

Artikuluaren hasierak zera dio: "Zientzia oso egokia da kultura desberdinetako jendea lotzeko eta batzuek eta besteak hobeto ulertzeko. Ekimenaren helburuetako bat da giza zientzietan nazioarteko lankidetza bultzatzea, eta egungo ardatza da Mendebaldean eta Ekialde Ertainean neurozientzien arloan ari diren taldeen arteko loturak ezartzea".

Peñagarikanok azaldu du proiektuak bi fase izango dituela. "Egun, zientziaren arloko hainbat ekitalditan ari dira parte hartzen ekimenaren berri emateko eta giza zientzien alorrean lankidetza sustatzeko, eta, batez ere, lan arlo nagusia burmuina izanik. Hasieran, dirua lortzen saiatuko da truke programak eta lankidetza programak egiteko. Bigarren fasean, institutu bikiak sortu nahi dituzte, bata Mendebaldeko herrialderen batean eta bestea Ekialde Ertaineko edo Asiako hegoaldeko herrialderen batean. Hartara, bi institutuek elkarren lanaz baliatu ahal izango baitira elkarrizketa irekia izanik bien artean eta ideiak trukatuz".

«Zientzia bakerako bide izan daiteke [...] lankidetza sustatzeko eta aniztasuna bultzatzeko»

Agiriak Erdi Aroan arabiar eta persiar kulturak bizi izandako Urrezko Aroan kulturen artean izan zen trukearen ikuspegi orokorra azaltzen du. Tolerantziarako eta ideian truke askerako eredu historikoa izan zen hura, eta, egun, erreferentzia izan daiteke Mendebaldeko, Ekialde Ertaineko eta Asiako hegoaldeko kulturak lotzeko zientziaren bidez. Artikuluaren arabera, "zientzia bakerako eta adiskidantzarako bide izan daiteke eta neurozientziak komunitate ireki bat eratzeko bitarteko egoki horren bidez lankidetza sustatzeko eta aniztasuna bultzatzeko".

Temas

Euskera

Contenido Patrocinado

Fotos

Vídeos