16 udalek genero ikuspegia lantzeko diru laguntzak jasoko dituzte

Errenteriak Eusko Jaurlaritzako Ingurumen, Lurralde Plangintza eta Etxebizitza Sailaren finantzaketa jasoko du/Arizmendi
Errenteriak Eusko Jaurlaritzako Ingurumen, Lurralde Plangintza eta Etxebizitza Sailaren finantzaketa jasoko du / Arizmendi

Genero ikuspegia udal planetan sartzeko laguntzen deialdira 24 udal aurkeztu ziren, baina 16 izango dira tokian tokiko berezitasunen arabera dirua jasoko dutenak

Euskal Autonomia Erkidegoko (EAE) 16 udalek Eusko Jaurlaritzako Ingurumen, Lurralde Plangintza eta Etxebizitza Sailaren finantzaketa jasoko dute udal planetan genero ikuspegia sartzeko. Zehazki, Getxo, Durango, Erandio, Basauri, Leioa, Lemoa, Zamudio, Lekeitio, Lezama, Zornotza, Errenteria, Zierbena, Etxebarri, Munitibar, Ortuella eta Ispaster dira 3.375 eta 20.175 euro arteko diru laguntzak jasoko dituzten udalak.

Lurralde Plangintzaren Sailburuordetzak irailean abiaturiko laguntzen deialdira 24 udal aurkeztu ziren. Haietako zortzi kanpoan geratu ziren, ez zituztelako deialdiaren baldintzak betetzen. Ildo horretan, 2018an udalek planteatutako ahalik eta behar eta eskaera gehienei erantzuteko, Lurralde Plangintzaren Sailburuordetzak lan saioak egingo ditu aurretik udalekin, eta lan saio horietako ondorioak baliagarriak izango dira tokian tokiko berezitasunen araberako oinarriak diseinatzeko.

Udal gehienek generoaren ikuspegia haien hiri antolamenduko plan orokorretan sartzeko erabiliko dute diru laguntza, hau da, haien herrien etorkizuneko diseinuan generoaren ikuspegia txertatzeko.

Arantza Leturiondo Lurralde Plangintzaren sailburuordea "oso pozik" azaldu da laguntzen lehen deialdiak izan duen onarpenarekin. Bere iritziz, laguntzak aitzindariak dira, eta helburua da "bermatzea, besteak beste, gizonek eta emakumeek aukera berdinekin baliatu ahal izango dituztela lurraldeko baliabideak eta ekipamenduak, eta emakumeen segurtasuna areagotzea espazio publikoetan".

Pertsonek, haien eguneroko bizitzan bere egiten dituzten genero rolen ondorioz, askotariko beharrak dituzte lurraldeari eta hiri eta landa espazioari dagokionez. Ildo horretan, egiaztatu da genero desberdintasunak daudela ekipamenduen eta zerbitzuen erabilerari dagokionez eta horiek baliatzeko aukerari dagokionez. Hori dela eta, Ingurumen, Lurralde Plangintza eta Etxebizitza Sailaren iritziz, generoaren ikuspegia hiri plangintzan barnean hartzea "funtsezko tresna" da gizonek eta emakumeek baliabide guztiak baldintza berdinetan baliatu ahal izateko.

Leturiondok adierazi duenez, diru laguntzen bidez "lurralde inklusiboa eta denboran finkatua eraikitzeko oinarriak finkatu nahi ditugu, udalei hori lortzeko beharrezkoak diren tresnak eskainiz". "Udaletik jardun daiteke errazenen, bertatik lor daiteke gehiago gutxiagorekin. Ez da inbertsio handiak egitea, kontzientziaz eta zorroztasunez jardutea baizik. Batzuetan, oso gauza sinpleak dira, hala nola espaloi zabalak diseinatzea, kaleak ondo argiztatzea, espazio garbiak, seguruak eta irisgarriak sortzea edo hiriko markesinak eta igogailuak gardenak izan daitezen ziurtatzea", gaineratu du.

Temas

Euskera

Contenido Patrocinado

Fotos

Vídeos