Txinan ederki funtzionatzen du, Europan ez horren ondo

Gobee bizikleta berde bat Pariseko Velib ezagunen geltoki baten ondoan./M.I.
Gobee bizikleta berde bat Pariseko Velib ezagunen geltoki baten ondoan. / M.I.

'Zerbitzu libreko' bizikletak eskaintzen dituen Gobee.bike konpainiak Frantzian eta Belgikan zerbitzua bertan behera uztea erabaki du, bandalismoa dela eta

Iaz, bizikleta partekatuaren erraldoi txinatarrak Europara begira jarri ziren, pentsatuz han horren ondo funtzionatzen ari diren 'zerbitzu libreko' bizikletak arrakastaz egokituko zirela kontinente zaharreko hirietara. Zenbait proiektu esperimentalen ondoren, uda partean ekin zioten hedapen masiboari, eta dagoeneko ohiko elementu bilakatu dira zenbait hiritako paisaian. Azken hilabeteotan Parisen izan denak, esaterako, kolore guztietakoak ikusiko zituen edozein kale bazterretan utzita, hurrengo erabiltzailearen zain: berdeak, horiak, zuriak...

Bada bizikleta berdeak, egoitza Hong Kongen duen Gobee.bike konpainiarenak, segituan desagertuko dira Parisko kaleetatik, enpresak erabaki baitu zerbitzua bertan behera uztea, aurretik Lille eta Reims Frantziako hirietan eta Belgikako Bruselan egin bezala. Arrazoia, bandalismoa: lapurretak eta nahita egindako matxura-kopuru jasanezina.

Parisera 2.000 bizikletarekin heldu zen Gobee.bike. Eredu horren arabera funtzionatzen duten gainerako sareetan bezala, erabiltzaileak aplikazio bat deskargatu behar du, eta izena eman zerbitzuan. Bizikleta bat behar duenean, denak geolokalizatuta daudenez, aplikazioan ikusiko du non duen hurbilenekoa. Bizikletak ez dira lotuta egoten, blokeatuta baizik. Aplikazioa daukanak barra-kode bat irakurrita desblokeatzen du bizikleta, eta behin egin nahi zuen txangoa bukatuta (konpainia honen kasuan, 50 zentimo ordaindu behar dira ordu erdiko), ondo datorkion tokian uzten du bizikleta. Hantxe gelditzen da, blokeatuta, hurrengo erabiltzailearen zain. Gomendatzen dute toki babestu batean uztea, Velib-en geltokietatik hurbil ahal dena, baina inork gutxik egiten die jaramon aholkuei.

Hori da teoria, eta badirudi ederki funtzionatzen duela Txinan. Europako esperientzia, ordea, ez da horren ona izan bizikleta berdeen konpainiarentzat. Joan den larunbatean zabaldu zuten ohar batean, zerbitzua etetera zihoazela azaltzeaz gain, honakoa adierazi zuten: "Tamalez, borondate ona eta ahaleginak ez dira nahikoa izan. Abenduaren erdialdetik aurrera gure flotaren aurkako erasoak ugaldu egin dira Frantzia osoan. Lapurretak eta narriatzeak etengabe hazi dira, zenbaiten denbora-pasa bilakatuta. Gehienetan adin txikikoak izan dira erasotzaileak, eta sare sozialetan zabaldu eta partekatu diren edukiek animatuta jardun dira".

Datuak oso adierazgarriak dira: zerbitzua ezarrita zegoen hiru hirietako datuak batuz, 1.000 bizikleta lapurtu dizkiete, eta 3.200 hondatu. Ia flota osoak jasan ditu erasoak, eta 6.500 bider eraman behar izan dituzte bizikletak tailerrera.

Hortaz, 'au revoir' esatea erabaki dute, izena emandako erabiltzaileei aurreratuz 10 eguneko epean itzuliko zaiela, horrelakorik izatekotan, gelditzen zitzaien kreditua.

Temas

Euskera

Contenido Patrocinado

Fotos

Vídeos