Turistentzako 'prestakuntza militar' israeldarra lurralde okupatuetan

Egiazkoa balitz bezala: turistan izututa, monitoreak paperean sartuta, eta 'terrorista' lurrean inmobilizatuta./AFP PHOTO/MENAHEM KAHANA
Egiazkoa balitz bezala: turistan izututa, monitoreak paperean sartuta, eta 'terrorista' lurrean inmobilizatuta. / AFP PHOTO/MENAHEM KAHANA

100 euroren truke, "terrorismoaren aurkako borrokan" trebatzen dituzte militar ohiek Zisjordaniako kokagune judu batean. Zenbait palestinarren ustez, "gorrotoa hedatzea" dute helburu

M. IMAZ

Armak ez dira jostailuak, tiroka ibiltzea ez da jolasa, are gutxiago egiazko gerra zer den ondoegi dakiten tokietan. Esate baterako, Palestinako Zisjordanian Israelek okupatuta dauzkan lurraldeetan. Hala ere, norbaitek oporrak aprobetxatu nahi baditu gerra-jolasetarako, hortxe aurkituko du urtean milaka turista erakartzen dituen Caliber 3 enpresa. Jerusalem inguratzen duten zenbait kokagune juduk, aspaldikoak gehienak, osatzen duten Gush Etzion barrutian dago, eta turistei zuzendutako programa bere jardueraren ataletako bat baino ezta. "Kontraterrorismoan eta segurtasunean" trebatzeko akademiatzat du alegia bere burua 2003an Israelgo armadako kide izandako militar batek sortu zuen enpresak. Caliber 3 Efraten dago zehazki, judu ortodoxoak ugariak diren eta asentamendu berriak etengabe eraikitzen ari diren hirian.

Hor, inguru eta giro horretan, euren lana oso serio hartzen duten militar ohien eskutik, turista horiek "terrorismoaren kontrako borrokaren " zirrara senti dezakete 100 dolarren truke. 2009ra arte profesionalak entrenatzen zituzten soilik Caliber 3n. Urte horretan konturatu ziren jende askok zituela gustu berezi samarrak, eta itxuraz oso ondo doakien negozioa jarri zuten abian. Eurek emandako datuen arabera, 2016an 25.000 turista atzerritar hartu zituzten.

"Palestinarren aurkako gorrotoa txertatzen duten turistengan, euren etxeetara iristen direnean gorroto hori heda dezaten" Mohamed Burjieh, irakasle palestinarra

"Turistei esplikatzen diegu zein diren gerra klasikotik oso urrun dagoen gerra honek dituen zailtasunak" Yoav Fleishman, monitore israeldarra

Atzo zortzi egindako argazkietan ikus daitezke Hego Amerikako hogei bat lagunez osatutako taldeak jaso zuen 'prestakuntzaren' atal desberdinak. Adineko pertsonak daude, haurrak ere bai. AFP agentziak zabaldutako oharraren arabera, hitzokin hartu zituen Eitan Cohen instructoreak: "Prestakuntza-saio honen helburua ez da disparatzen irakastea, baizik eta ulertaraztea zer egiten dugun hemen, Israelen, terrorismoa borrokatzeko". Turistei eskaintzen zaie gezurrezko armekin instrukzio-plantak egiteko aukera, egiazko armekin tiro egiteko modua, paintballean aritzekoa eta krav maga zer den ikastekoa. Erasoaldi simulazioa ere egiten diete. Bat-batean, militarrez jantzitako monitoreak azaltzen dira, lurrean etzateko esaten diete turistei, 'terrorista' bat dabilela… Segituan harrapatzen dute eskuan labana daraman 'terrorista'. Sorpresa, edo zuzentasun politikoari egindako keinua: 'gaizkilea' ez da buruan 'kufiya' edo zapi palestinarra daraman gizonezkoa... "Turistei esplikatzen diegu zein diren gerra klasikotik oso urrun dagoen gerra honek dituen zailtasunak", adierazi zuen Yoav Fleishman Caliber 3ko monitoreak.

Turistak, jakina, etengabe egiten dituzte argazkiak. Gero zer kontatuko duten, batek daki, oso lausoa baita, toki batzuetan bereziki, fikzioaren eta errealitatearen arteko muga. AFP agentziak zabaldutako oharrean 43 urteko Lili Cohen venezuelarraren hitzak jaso zituzten: "Izugarria izan da, gaur gauza asko ulertu ditut". "Ikastera etorri naiz, hezigarria eta dibertigarria izan da", esan zuen Dan Cohen senarrak.

Denak ez daude ordea ekimenarekin gustura. Enpresak kolonoen eta palestinarren arteko gatazka bizi-bizirik dagoen eremuaren "irudi txarra" ematen duela dioen judurik bada. Baina batez ere palestinarrak dira kexu. Mohamed Burjieh irakasle palestinarraren ustez, Palestinaren aurkako gorrotoa sustatzeko darabilte israeldarrek enpresa. Haren hitzetan, Caliber 3 konpainiak "terrorismoaren mamua astintzen du Israelen krimenak estaltzeko. Enpresa horretako kolonoek palestinarren aurkako gorrotoa txertatzen duten turistengan, euren etxeetara iristen direnean gorroto hori heda dezaten".

Temas

Euskera

Fotos

Vídeos