«Soldata duinak» akdarrikatu dituzte prestakuntza kontratuak dituzten EHUko ikertzaileek

Artxiboko argazkian, UPV-EHUko laborategi bateko mikroskopioak./LUSA
Artxiboko argazkian, UPV-EHUko laborategi bateko mikroskopioak. / LUSA

Doktoregaien Asanbladak elkarretaratzeak egin ditu ostegun honetan, «egoera prekarizatua» salatu eta unibertsitateak behingoz haien «langile izaera aitor dezan»

Euskal Herriko Unibertsitateko Doktoregaien Asanbladak elkarretaratzeak egin ditu ostegun honetan «soldata duinak» eta kalte ordainerako eskubidea eskatzeko. Mobilizazioak Leioako campuseko liburutegiaren parean eta Donostiako ikasgelategian deitu dituzte, «unibertsitateak behingoz beren langile izaera aitor dezan eta, ondorioz, hitzarmen kolektiboan sar ditzan».

Modu honetan, EHUko Doktoregaien Asanbladak Nekane Balluerka errektorearen «zinismoa» salatu du, «lizentziatu eta graduatuentzat lan baldintza duinak eskatzen dituen bitartean, EHUko ikertzaileei ukatu egiten baitizkie».

Elkarteak azaldu duenez, EHUn 300dik gora ikertzaile doktoregaiek egiten dute lan. Tesia egiteaz gain, beste hainbat ikerketatan kolaboratzen eta irakaskuntzan parte hartzen dihardute, eta biltzarretara eta mintegietara joan ohi dira, «euskal unibertsitate publikoaren izena munduan zehar zabalduz».

Alabaina, beste lan kategoria batzuk dituztenen lanaldi eta ikerketa lan berbera egin arren, «konparazioan dituzten baldintza prekarizatuak» salatu ditu EHUko Doktoregaien Asanbladak, eta ordainsarietan %44rainoko aldea izaten dela kritikatu du.

990 euroko soldatak

Kolektiboa unibertsitatearen campusetan eta Estatuan zehar mobilizatu zen joan den urtean, gerora lehengoratu zuten kontratu aldaketa baten aurka. Asanbladak «anbiguetate juridiko eta hutsune legalak» daudela salatu du, unibertsitateak haie lan eskubideak «ahultzeko baliatzen» dituenak, bereziki «soldatari eta kontratua amaitzeagatiko kalte ordainari» dagokienean.

Ildo horretan, «prestakuntza» kontratu batekin «zokoratu» nahi dituztela salatu dute ikertzaileek, lan sariarentzat eta lan-baldintzentzat «ondorio kaltegarri agerikoekin». «Errektorearentzat eskandaluzkoa da lizentziatuek eta graduatuek 1.000 eurotik behera kobratzea, ez ordea EHUko ikertzaileek 909 euroko soldata izatea. Atentzioa ematen digu Nekane Balluerkak, hauteskunde kanpainan esandakoaren arabera sentsibilitate eta kolektibo desberdinen integratzaile behar zuenak, EHUko ikertzaileen duintasuna horrela laidotzen uzteak», salatu dute.

«Egiturazko» egoera horren aurrean, EHU kontratua amaitzeagatiko kalte-ordainak ordaintzen berriro hastea ere eskatu dute ikertzaileek. «Gure kontratuak prestakuntzakoa dela dio, baina gezurra da. Gainera, badakigu beste unibertsitate batzuk kalte ordaina ordaintzen jarraitu dutela. Errektorearen eta bere taldearen erabaki honek gure lan eskubideak kaltetzen ditu, eta horiek errespeta ditzaten eta egoerari konponbide bat eman diezaioten exijitzen dugu, hitzarmen kolektiboan berariazko figura bat sartuz», azaldu du elkarteak.

Temas

Euskera

Contenido Patrocinado

Fotos

Vídeos