Diario Vasco

Botikek haurrengan dituzten eragin kaltegarriak gutxitan dira alergiak

Erreakzio gehienak, adibidez azkurea, ez dira larriak.
Erreakzio gehienak, adibidez azkurea, ez dira larriak. / FOTOLIA
  • Susmo horrekin alergologoarengana eramaten dituzten haurren erdiak dira bakarrik alergikoak

Botikaren batek edo batzuek haurrengan eragin kaltegarriak izateak ez du ezinbestean esan nahi ume horiek alergikoak direnik. Aitzitik, susmo horrekin alergologoarengana eramaten dituzten haurreN erdiek ez dute inolako alergiarik. Hori erakutsi dute egunotan Donostian egiten ari den Alergologia eta Inmunologia Klinikoaren batzarreko saioetan.

«Haurrengan, botikekiko alergia ez da ohiko fenomenoa, susmo hori kontsulta askoren jatorriak badago ere», dio Donostia Unibertsitate Ospitaleko Alergologia zerbitzuko buru den Alejandro Joral doktoreak. «Arnasbideetako infekzioak dituzten haurrengan azaltzen diren larruazaleko erupzio asko umea hartzen ari den antobiotikoak eragindako erreakzio alergikoei egozten zaizkie, baina maiz ez da alergia bat, eta antobiotikoak berak ere ez du zerikusirik erreakzioarekin» zehaztu du. Hala ere, «pediatrek haurrak alergologoarengana bidaltzen dituzte erreakzio alergikoa baztertzeko, baina zorionez frogak egin eta berresten ditugunean ikusten dugu ez dela alergia, alergia farmakologikoek eragiten dituztenen antzeko ondorioak dituzten prozesu infekzioso edo birikoak baizik», adierazi du Sara Martinez Donostia Ospitaleko Alergologia zerbitzuko doktoreak.

Ospitale horretan bildutako eta aztertutako datuen arabera, botikekiko alergia delakoan atenditzen dituzten haur gehienen kasuan ikusten da ez dagoela inolako alergiarik, aipatutako prozesu infekziosoren bat baizik. «Kasuak egon badaude, noski, baina aurretik nahiko argi dagoen diagnostikoa berresteko bidaltzen dizkiguten beste alergia mota batzuk -janari-alergiak, ukipen-dermatitisak...-, baino askoz ere gutxiago izan ohi dira», azaldu du.

Biltzarrean aurkeztu den ikerketa batek penizilinekiko alergiak aztertu ditu zehazki. Horren arabera, haurren artean horrelako botikek eragindako kontrako efektuen portzentaje oso txiki batek (ez da %10era iristen) du jatorria benetako hipersentikortasunean. Horrenbestez, kontsultara eramaten dituzten 20 haurretatik bakar bat da alergikoa. Antibiotikoen artean amoxizilina da kontrako erreakzio gehien sorrarazten dituena, eta oso atzetik datoz penizilinak. Normalean, erreakzioak ez dira larriak izaten. Ohikoena urtikaria alergikoa da, eta urrun gelditzen dira hurrengoak, hala nola botagura, riniusa, azkura... Eragin larriak oso-oso urriak direla azpimarratu dute. Erreakzio denak, gainera, oso erraz kontrolatzen dira antihistaminiko eta kortikoideekin.

Temas

Recibe nuestras newsletters en tu email

Apúntate