'Saltillo' ontzia bere garaiko kideekin itzuli da jatorrizko egitekora

'Saltillo'-ren eskifaia, ahalegin betean. / FERNANDO CASA UPV/EHU

Hilaren 17an Hendaian abiatu zen belaontzi klasikoaren rallyan parte hartu ondoren, Gitana Kopan aritu da

Udan, portuz portu ibili ohi da 'Saltillo', UPV/EHUren Nautika eta Itsas Garraioko eta Itsasketako graduko ikasleak praktikak egiteko erabili ohi duten belaontzi historikoa. Horrez gain, 1932an eraiki eta handik bi urtera Pedro Galindez enpresari bizkaitarrak erosi zuen ontzia EAEko unibertsitate publikoaren enbaxadore ere bada itsasoarekin eta ontzi historikoekin zerikusia duten elkarretaratze nagusietan. Izan ere, hainbat urtez Espainiako errege Felipe VI. aitona Juanek, Bartzelonako konteak alegia, erabilitako ontzia EHUren esku geratu zen 1998an, eta orduz geroztik makina bat itsas milia egin ditu, azken urteotan Mikel Lejarza kapitainaren ardurapean.

Aurten konpainia oso onean dabil. Asteartean, UPV/EHUK nabarmendu bezala, "Bermeo eta Getxo artean dauden 18 miliak egin zituen, beste nazioarteko 11 harribitxizko belaontziekin batera, Abrako uretan egingo de Copa Gitana txapelketaren harira egin zen belaontzi klasikoen topaketaren baitan". Lehenagotik zebiltzan elkarrekin Mutrikun ere geldialdia egin zuten ontziek, nelaontzi klasikoen rallya abuztuaren 17an abiatu baitzen Hendaian, orduz geroztik Euskal Herriko itsasertz osoa zeharkatu du. UPV/EHUko Saltillo ontzi-eskolarekin batera topaketan parte hartu dute ondorengo hauek: Artako, Arren Chan Passiou, Eloise II, Jade, Kanthaka, Khayyam, La Gaillarde, Lasse, Niñita, Rouvelon, Sacrebelu!, Thalamus, Tikaroa eta Westward of Clynder.

Azken hitzordua Real Club Marítimo del Abra eta Real Sporting Clubek antolatzen duten Gitana Kopa da, estatu mailako garrantzitsuenetakoa, azken saioa larunbat honetan egingo duena eta 'Saltillo' eta horren eskifaia itsasoan nola defenditzen diren ikusteko aukera bikaina.

Saltillo bezalako itsasontzi bat tripulatzea ez da erraza. 26 metroko luzera eta 81 tona ditu, eta dimentsio horietako belaontzia gidatzeko lan zorrotza eta zehatza egin behar da. Nautika eta Itsas Garraioko eta Itsasketako graduko ikasleentzat benetako prozesu praktikoa da. Maniobrak egin, nabigazio mapak prestatu, irrati bidez komunikatu, mesana, fokea edo trinketa jaso eta jaitsi dira egin beharreko jardueretako batzuk.

Itsasaldiaren kronikak dioenez, "lau laguneko hiru taldetan banatuta den tripulazioak kapitainaren aginduak jarraitzen ditu, haizea eta olatuak menperatzeko. Ez dago kezkarako tartetik, sosegurako eta talde lanerako baizik. Itsasoak zakar jarraitzen du, eta belak dantzan kulunkatzen dira. Bi antzezle baino ez daude jada: itsasoa eta Saltillo. Olatuek brankan apurtzen dute, eta itsasoa jaioterri duten eta elementuekin jauzi egiten duten nabigatzaileek egoera goresten dute". Abentura ederra, beraz, biharko itsas-gizon eta emakumeek egunotan bizi dutena, 'Itsas zabala' bideoari esker edonork parteka dezakeena.

Temas

Euskera

Fotos

Vídeos