Euren kasa bizi diren gazteen artean hazi da batik bat patata kontsumoa

AFP

Espainiar estatuko biztanleen batez besteko urteko kontsumoa 30 kilotik gorakoa da. Patata gehien jaten dutenak 50 urte beteta dituztenak badira ere, gazteen artean hazi da gehien kontsumoa

M. IMAZ

Patatak botiken artean sailkatu beharko liratekeela dionik bada, ez aparteko balio terapeutikorik dutelako, baizik eta goseteetan milaka bizitza salbatu dituztelako. Azken urteotako krisialdiak, horren urruti joan gabe, estutasun ekonomikoen eta patataren arteko lotura berretsi du, 2010. urteaz geroztik gorantz egin baitu tuberkulu horren kontsumoak. Eta nahiz eta norbaitzuk dioten krisia gainditutzat jo behar dela, patataren kontsumoak ez du hori adierazten, handitu egin baita berriro, Nekazaritza eta Arrantza, Elikadura eta Ingurumen Ministerioaren datuen arabera.

Ministerioak zabaldu duen datua, hain zuzen, 2016ko martxotik 2017ko martxora bitarteko 'urte mugikorrari' dagokion kontsumoari buruzkoa da. Adin-tarte guztiak barne hartuta, %0,5eko igoera txiki bat jasotzen badu ere, hazkundea handiagoa da zenbait kolektibotan. Zehazki, krisiak gogor jo dituen gazte emantzipatuetan eta guraso bakar baten kargura dauden familietan.

Batez beste, 30,19 kilo patata jan zituen hamabi hilabete horietan Espainiar estatuko biztanle bakoitzak; aurreko urtean baino %0,5 gehiago. Prezioen bilakaeraren ondorioz, askoz ere gehiago hazi zen patatak erostera bideratutako dirua: %8,4. Guztira 1.326 milioi kilo patata erosi ziren, aurreko urtean baino 6,3 milioi kilo gehiago.

Patatazaleenak seme-alaba koskortuak dituzten bikoteak, seme-alabarik gabeko bikote helduak eta herri txikietan bizi diren guraso bakarreko familiak dira. Hain zuzen ere, erosketaren ardura 50-64 urte bitarteko pertsonek dutenean sartzen dira patata gehiago etxeetan. Oraindik ere erretiratuak dira patata gehien jaten dutenak: 43 kilotik gora urtean, ia kiloa astean. Hala ere, euren kabuz bizi diren gazteen artean areagotu da bereziki kontsumoa, %8,4ko hazkundea izan baitu. Guraso bakarreko familietan ere aurreko urtean baino patata gehiago sartu zituzten saskian: %5 gehiago.

Temas

Euskera

Fotos

Vídeos