Nahikoa dira egungo legeak indarkeria matxistari aurre egiteko?

Ángela Gonzálezen kasuaz ere mintzatuko dira. 2014. urtean, NBEak arrazoia eman zion Espainiar Estatuaren aurka jarritako salaketan. Ordukoa da argazkia./EFE
Ángela Gonzálezen kasuaz ere mintzatuko dira. 2014. urtean, NBEak arrazoia eman zion Espainiar Estatuaren aurka jarritako salaketan. Ordukoa da argazkia. / EFE

Eusko Legebiltzarra lege berria prestatzen ari den honetan, hausnarketarako eta eztabaidarako jardunaldiak antolatu ditu Mugarik Gabek Bilbon datorren asterako

"Indarkeria matxistarik gabeko bizimodu librean oinarrituriko legeen inguruan" hitz egiteko, jardunaldiak antolatu ditu azaroaren 2, 3 eta 4rako, Bilbon, Mugarik Gabek. "Eusko Legebiltzarra honen inguruko lege berria prestatzen dagoen bitartean, jardunaldien helburua autonomia erkidego, estatu eta Latinoamerikako legeen inguruko hausnarketak eta eztabaidak sortzea da", diote antolatzaileek, "indarkeria matxistarik gabeko bizimodua irudikatzea eta legeek zerbaitetarako balio ote duten jakitea da", Mugarik Gabeko kide Joana Etxanok jardunaldien aurkezpenean azaldu zuenez.

Saioetan zehar "Estatuan eta Latinoamerikan dauden legeak aztertuko ditugu eta proposamenak egingo dituzte kolektibo sozial eta feministetik", gaineratu zuen Rosana Pastor Mujeres del Mundo-ko kideak. Zehazki, Katalunia, Nafarroa eta 2004. urteaz geroztik Estatuan dauden legeak aztertuko dira. Gainera, El Salvador eta Brasileko (Convención de Belem do Pará) kasuak ezagutaraziko dira. Nazio Batuen Erakundeak, CEDAW-en (Convención sobre la Eliminación de Todas las Formas de Discrimación contra la Mujer) bidez Espainiako estatuari Ángela Gonzálezen kasua dela eta ezarritako zigorra ere izango da hizpide.

"Ez dituzte beharrak asetzen"

Ángela Gonzálezen zazpi urteko alaba haurraren aitak hil zuen 2003an. Urte askoan tratu txarrak jasan ondoren, Ángela González banandua zen, baina ez zuen lortu haurra aitarengandik urruntzea eta, gero ikusi zen moduan, babestea. Alferrikakoak izan ziren bisitak bertan behera utz zitzatzen egin zituen ahalegin guztiak. Felipe Rascón senar ohiak alaba hil eta bere buruaz beste egin zuzenean, Ángelak Espainiar estatua salatu zuen, erailketaren erantzule zelakoan. Bide luze eta gogor baten ondoren, arrazoia eman zion Nazio Batuen Erakundeak, eta 2014. urtean 'utzikeria' leporatu zion Estatuaro, eta kalteordainak ordaintzera behartu zuen.

"Legeek gure bizimoduan eragiten dute eta zer iruditzen zaigun esateko eskubidea dugu", adierazi zuen Etxanok. Eta hasi dira esaten: "Gaur egungo indarkeria matxisten inguruko legeek ez dituzte emakumeen beharrak asetzen eta onartuak dauden legeek ez dute balio beste indarkeri motentzako", adierazi zuen aurkezpenean. Horren ondorioz, kasu asko daude, eta salaketa asko, beste indarkeria mota batzuekin identifikatzen direnak, ez baita onartzen generoarekiko loturarik dutenik.

"Emakume eta kasu asko kanpoan geratzen dira eta gainera, ebaluazioek esaten dutenaren arabera legearen aplikazioa ez da nahikoa", nabarmendu zuten. Badaude, ordea, proposamen berriak. Hala, Kataluniako Legeak indarkeria matxistaren konzeptualizazioa Espainiakoak baino askoz zabalagoa duela gogorazi zuten, eta Nafarroakoa ere aipatu zuten, aspektu berriak sartu dituelako,"feminizidio hitza edo erreparazioaren ideia", adibidez. Jardunaldiei buruzko informazioa zehatza eta izena emateko modua, hemen aurki daitezke.

Temas

Euskera

Fotos

Vídeos