Ume mukitsu batzuen aldrebeskeria edo zerbait larriagoa?

Beste marrazki batzuen ondoan, Hitlerrena gogora dakarren bibotea eta svastika nazia margotu dizkiote musikaren musari.
Beste marrazki batzuen ondoan, Hitlerrena gogora dakarren bibotea eta svastika nazia margotu dizkiote musikaren musari.

Gasteizen estatua bati pintatu dizkioten ikur nazien harira, gaiaren inguruko gogoeta piztu nahi izan du Podemosen udal taldeak

M. IMAZ

Gasteizen gertatu da oraingoan, baina beste hiri eta herri askotan ere gertatzen da. Sinbologia faszistaz, edo beste ideologia batzuk islatzen dituzten ikurrez, edo konnotazio ideologikorik ez duten testu eta marrazkiekin, ondare publikoa narriatzea ohikoa ez ezik 'normala' ere bada askorentzat.

Kasu honetan, kaltetua 'Ur lorategi sekretua' izeneko lorategian kokatutako eskultura bat izan da, Euterpe musikaren musa irudikatzen duena. Eserita eta biluzik dago, lira moduko bat du eskuetan, eta tatuaia itxurako esaldi eta marrazkiz bete diote gorputza. Horien artean daude hainbat svastika nazi, SS-en sinboloa, Hitlerrena gogoratzen duen bibotea eta diana bat. Bi bihotz eta zakil bat ere badaude, izenak, eta ustezko ukitu umoristiko edo poetikoa duten motibo eta esaldiak ere bai. Bakar batek ez du edertzen Eusko Legebiltzarretik gertu dagoen lorategi bitxiak kokatuta dagoen eskultura. Bitxia eta ezaguna da, hain zuzen, ur kontsumo txikikoa delako eta landare espezie asko biltzen dituelako kaxa itxurako batzuetan.

Gorputzaren beste atal batzuetan ere egin dizkiote pintadak estatuari.

Podemosen udal taldeak eman du, ohar baten bidez, eskulturari egindako erasoen berri, horietako zenbaiten 'sinbologia nazia' salatuz. Salaketa egiteko hedatu duen oharrean zehaztu duenez, eskultura ez da kaletik ikusten, baina Gasteizko Sindikoaren bulegoen atearen ondo-ondoan dagoenez "oso erraza da ikustea, eragina oso desatsegina suertatzen delarik".

"Pintada faszistak ez dira ongi etorriak gure hirian. Eskatzen diogu udal gobernuari ezaba ditzala segituan", eskatu du Juan Cerezuela zinegotziak. Adierazi du, halaber, ez dela ekintza isolatua. "Hiriko beste gune batzuk ere erasotu dituzte horrela, baina kasu hau bereziki deigarria iruditzen zaigu", esan du.

"Arteari eta artistei zor zaien errespetuagatik", hiruko kultur ondarearen mantenimendu egokia eskatzeaz gain, "balio demokratikoen defentsa" aldarrikatu du Cerezuelak, eta beste egoera askotara eraman daitekeen gogoeta egin du: "Sortzaile baten lana hondatzea edo laidotzea ezin dugu jo besterik gabeko baldarkeriatzat. Hori dela eta, udal gobernuari eskatzen diogu azter ditzala kontzientziazio-jarduerak egiteko aukerak, gure ondarearen etsai nagusiari aurre egin ahal izateko".

Temas

Euskera

Fotos

Vídeos