Mirentxu Purroy kazetari eta zinegilea omendu dute Nafarroako ikastolek

Saria emateko antolatu zen ekitaldian Purroyren ibilbidea nabarmendu zuten./NIE
Saria emateko antolatu zen ekitaldian Purroyren ibilbidea nabarmendu zuten. / NIE

"Informazio-eskubidearekiko eta euskal kulturarekiko bizitza osoko konpromisoa" aitortu diote, NIE sariaren bitartez

Mirentxu Purroy kazetariari eman dio Nafarroako Ikastolen Elkarteak NIE saria, horren bidez aitortu nahi izan duelarik "kazetari eta film zuzendari eta gidoilari bezala izandako ibilbidea". Saria Mikel Asiainek eta Josu Reparazek eman diote, Nafarroako Ikastolen Elkarteko lehendakariak eta zuzendariak, hurrenez hurren, "emakume iruindar honen figura eta informazio-eskubidearekin, justizia sozialarekin eta euskal kulturarekin duen konpromisoa" goraipatzeko. Mirentxu Purroyk NIEri eskuzabaltasunez 'Denboraren gibelean' filma eman izana ere eskertu dute sariaren bidez.

"Emakume ausarta, Euskal Herriko kazetaritzan erreferentea, lehen emakumea egunkari baten zuzendaritzan, oso garai zailetan pentsamendu-askatasuna, adierazpen-askatasuna eta prentsa-askatasuna bultzatu eta defendatu zituelarik. Bere baloreen artean, etika nabarmentzen da, lanean zein bizitza pertsonalean", adierazi zuten Nafarroako ikastolen ordezkariek saria ematean.

"Pertsonen askatasuna bilatuz, informaziorako eskubidea bultzatzen laguntzeagatik", ‘Denboraren gibelean’ filmaren bitartez, "hezkuntzak, askatasunak eta laguntasunak duten garrantziaren inguruan gogoeta egiten laguntzeagatik" eta "euskararen eta euskal kulturaren sustapenean laguntzeagatik" jaso duen errekonozimendua eskertzeko orduan, Mirentxu Purroy esan zuen ikastolek "euskararen berpiztea" sinbolizatzen duteka, "euren estilo argi, unibertsal eta berritzailean, Europan pedagogikoa modernoaren buru direlarik".

Ibilbide konprometitua

Ekitaldia Mikel Asiainen eta Mirentxu Purroyren arteko elkarrizketa batean oinarritu zen, non saritutakoaren ibilbidea goraipatu baitzen, ibilbide hori ez baita nolanahikoa. 1975. urtean Nafarroako Unibertsitatean Informazio Zientzietan lizentziatu zen eta 1978. urtean Salamancan Psikologia Klinikoan eta Pedagogikoan ikasketak burutu zituen. 1976. urtean, beste kide batzuekin batera, 'Punto y Hora de Euskal Herria' aldizkaria sortu zuen, garai hartako erreferentziazko aldizkaria. Izan ere, behin baino gehiagotan poliziak bahitu baitzuen aldizkaria, galeradak apurtu eta jurisdikzio militarrak espetxeratu zuen Iruñeko presondegian, orain 41 urte Gabonak espetxean pasatu zituelarik.

1978an 'Triple A' talde terroristak bonba jarri zien eta horrek aldizkariaren proiektua uztea eragin zuen, baina ez profesioarekin zuen konpromisoa. Hortik, Egin egunkariko zuzendaritza bere gain hartu zuen 1978 eta 1980 urte bitartean. Bigarren kazetaritza epe honetatik, 1980. urtetik 1985. urtera, Estatu Batuetara joan zen eta bertan, zinematografia ikasi zuen New York Universityn eta Columbia Universityn. Zenbait film labur eta 'El silencio de los inocentes' metraje ertaineko filma zuzendu ondoren, 1993. urtean Denboraren gibelean, bere lehen film luzea estreinatu zuen. 1999ko azarotik, ETBko Mundo.hoy, gaurkotasun-gaiak eta kazetaritza-ikerketa jorratzen zituzten dokumentalak emititzen zuen saioko zuzendaria eta aurkezlea izan zen 2008. urtera arte.

Baldintza zailetan kazetari-zereginetan hiru hamarkada eman ondoren, Mirentxu Purroyk errekonozimendu soziala eta instituzionala ezagutzen hasi zen. Horrela, 2008an Bilbon Gizarte eta Komunikazio Euskadinews sarien I. edizioan, Komunikatzaile Onenaren EuskadiNews Saria jaso zuen, XXI. mende hobeago baten eraketarako egindako ekarpenagatik. Eta, 2017ko ekainean Nafarroako Gobernuak Karlos III. Prestuaren Gurutzea eman zion Nafarroaren irudia nabarmentzen laguntzeagatik eta informaziorako eskubidea sustatu, bultzatu eta garapenean egindako lanagatik. NIE Sariak, Nafarroako Ikastolen Elkarteak horren berri emateko zabaldu duen oharrean dioenez, "gure herriko kazetaritza alorrean garai bat markatu duen emakumearen ikuspegiari beste aitortza bat dakarkio".

Temas

Euskera

Contenido Patrocinado

Fotos

Vídeos