Mikroalgekin egindako irina, elikagaien propietateak hobetzeko

Artxiboko argazkian, mikroalga 'haztegi' bat. Ez du zerikusirik NEIKER-Teknaliarekin./
Artxiboko argazkian, mikroalga 'haztegi' bat. Ez du zerikusirik NEIKER-Teknaliarekin.

NEIKER-Tecnaliak lortu duen irinarekin pasta, okindegiko produktuak, jogurtak eta beste elikagai batzuk presta daitezke

Algak, mikroalgak barne, balio eta ahalmen handiko baliabide naturalak dira, eta ari dira aurka-apurka gure kontsumo ohituretan sartzen. Gehiengoari, ordea, zaila egiten zaio bere dietan algak sartzea, baina horrek ez du esan nahi produktu bereziak hartu gabe ere alga eta mikroalgen onurak baliatzea ezinezkoa denik.

NEIKER-Tecnaliak, hain zuzen, irinak lortu ditu mikroalgetatik, «elikagaietan osagai osasungarri gisa eta balio nutrizional handiko elementu moduan» erabiltzeko. Ohar baten bidez azaldu dutenez, «elikaduraren industriaren ikerketa eta berrikuntzaren arlorik interesgarrienetakoa ezaugarri natural hobetuak dituzten elikagaien garapena da». Arlo horretan lortutako aurrerapenek erantzuten diote «elikatzeko ohiturak eta elikagaien kalitatea hobetzeko erronkari, osasun eta bizitza kalitatearen iturri moduan biztanleriaren zahartzeari dagokionez».

Mikroalgak nekazaritzako elikagaien sektorean ustiatzeko ahalmen handiko baliabide naturaltzat jotzen dira. Osagai osasungarri moduan duten interesa ere gero eta handiagoa da. Landare proteinen iturri bikaina dira, eta, gainera, funtsezko gantz azidoak, bitaminak, konposatu antioxidatzaileak eta ezaugarri osasungarriak dituzten beste molekula batzuk dituzte.

Ondorioz, baliabide biologiko garrantzitsua da, hainbat esparrutan izan ditzaketen aplikazioengatik, eta handitzen ari da horien ekoizpena. «Mikroalgak nekazaritza modu berri bat dira, iraunkortasun maila handikoak, eta oso urrun ez dagoen etorkizunean elikaduraren oinarrietakoa izan daitezke», adierazi dute.

Elikagaien prototipoak

Joera horren lekuko da NEIKER-Tecnaliaren ekarpena. Eusko Jaurlaritzako Ekonomiaren Grapen eta Azpiegitura Saileko erakunde publikoak hainbat irin nutritibo lortu ditu lau mikroalga espezieren kultibotik, balio erantsi handikoak. Algek elikadurako osagai moduan duten bideragarritasuna aztertzeko proiektuaren barruan, NEIKER-Tecnaliak egiaztatu du mikroalgen osaera kimikoa ez dela espeziearen berezko faktorea, eta, aldiz, aldatu egin daitekeela, kultiboan erabiltzen diren ingurune baldintzen arabera.

Horrenbestez, lortu da mikroalgetan proteina eta karotenoideen kantitatea handitzea. Ahalmen antioxidatzaile handia duten konposatuak dira horiek, eta elikadura osasungarriaren sektorean gero eta gehiago eskatzen dira. Halaber, Omega 3ko edukia %50 handitu da.

Osaeraren arabera, irin horiek jogurt, pasta, ogi eta haragi prestakinetan gehitu dira, eta ondoren hainbat dasta-paneletan testatu dira, kontsumitzaileek egiten dieten harrera neurtzeko. Mikroalgen irinak elikagai horien osagai moduan sartzeak proteina, Omega 3 iturri, kobre iturri edo burdin eduki handiko produktu bihurtzen ditu.

Mikroalgetatik lortutako irina, produktu askori gehitzea dagoena.
Mikroalgetatik lortutako irina, produktu askori gehitzea dagoena. / NEIKER-Teknalia

Ikerketan zehar egiaztatu da mikroalgekin aberastutako elikagaiak horien aldaera konbentzionalak baino osasungarriagoak direla. Garatutako elikagaien artean, Omega 3an aberatsak diren irinekin prestatutako prototipoak bereziki interesgarriak izan ziren, gaur egun horrelako gantz azidoek osasunerako duten garrantziagatik.

Elikadura osasungarria eta industria lehiakorra sustatzeko lagungarriak diren produktuen garapena dira, besteak beste, Eusko Jaurlaritzaren Gastronomia eta Elikadurarako Plan Estrategikoaren (PEGA delakoaren) lehentasunak. Herritarren osasunerako ez ezik, mota honetako produktuak «aukera paregabea dira nekazaritzako elikagaien sektorearentzat, bereziki elikagaien industriarentzat, izan ere, gaur egun, elikagai osasungarrien negozio nitxoa oso garrantzitsua da, produktu berritzaileei lotutako erronka etengabea izateaz gain, kontsumitzaileek osasuna eskatzen duten heinean; gainera, lehiakortasuna gehitzen diote garapen betean dagoen merkatuko arlo horri».

NEIKER-Tecnaliak gidatutako ikerketa hau FICONUT proiektuaren esparruan egin da. Diziplina askoko egitasmoa da, mikroalgak elikagaien osagai moduan duten erabileraren inguruan berrikuntzarako aukerak esploratzeko, eta ELKARTEKek finantzatzen du (Eusko Jaurlaritzako Programa arlo estrategikoetan lankidetza bidez ikertzen laguntzeko). NEIKER-Tecnaliarekin batera, ikerketan parte hartu dute LEARTIKER S.COOP.ek, EHU/UPVko-Farmazia Fakultateko Kimika Analitikoko Departamentuak, TECNALIA Research and Innovation Fundazioak eta Basque Culinary Center Fundazioak.

Temas

Euskera

Contenido Patrocinado

Fotos

Vídeos