'Lagunkoiak gara' zigilua 400 establezimenduk dute jada

Askorentzat txikikeriak izan daitezkeen kontuak oztopo bilakatzen dira adineko zenbait pertsonarentzat./REUTERS
Askorentzat txikikeriak izan daitezkeen kontuak oztopo bilakatzen dira adineko zenbait pertsonarentzat. / REUTERS

Euskadi Lagunkoiak eta Donostia Lagunkoiak azterlan bat jarriko dute abian, «prestakuntza hori hobetzeko, dinamikoagoa eta parte hartzaileagoa izateko»

Zahartzen ari diren pertsonekin lagunkoiak diren merkataritza establezimenduen sareak handitzen jarraitzen du Euskal Autonomia Erkidegoan (EAE), eta horrela, gaur egun, ia 400 establezimenduk egin dute Euskadi Lagunkoiak sustatzen duen programaren prestakuntza eta lortu dute 'Lagunkoiak gara' zigilua Araban, Bizkaian eta Gipuzkoan.

Orain, «prestakuntza hori hobetzeko, dinamikoagoa eta parte hartzaileagoa izateko», Euskadi Lagunkoiak eta Donostia Lagunkoiak azterlan bat diseinatu eta abian jartzea adostu dute. Bilerak datorren astean hasiko dira, eta Donostiako adinekoek eta merkatariek parte hartuko dute.

Lide Amilibia Eusko Jaurlaritzako Gizarte Politiketako sailburuordeak adierazi ingurune fisikoak eta sozialak «erabakigarriak» direla pertsonak osasuntsu, independente eta autonomo egoteko zahartzaroan, eta esparru horretan, establezimendu lagunkoiek lagundu dezaketela pertsonek beren autonomiari denbora luzeagoz hel diezaioten.

Euskadi Lagunkoiaren, Donostiako Udalaren eta San Sebastian Shops, Auzoa, DendaSS, Federación Mercantil eta Zaharrean elkarteen arteko lankidetzaren ondorioz, bi topaketa antolatuko dira, maiatzaren 8an eta 9an, Tabakalerako Kultxa Kultur aretoan, Kutxa Fundazioarekin lankidetzan. Lan saio horietan, Donostiako merkatarien elkarteek eta 65 urtetik gorako pertsonek zahartzen ari den hirian hurbileko merkataritzaren rolaz hausnartuko dute.

Adinekoek merkataritzan dituzten eta merkatariek beren adineko bezeroetan dituzten errealitate, zalantza eta beharrizanak ezagutuko dira bileretan. Azken batean, helburua da zehaztea nolakoa izan beharko lukeen saltoki lagunkoi batek. Topaketen ondoren, dinamika berriak diseinatuko dira prestakuntzetarako, jarraian 'Establezimendu lagunkoia' prestakuntza tailer berriak abian jartzeko.

Establezimendu lagunkoien programa duela bi urte sortu zen, Euskadiko establezimendu publikoetan lagunkoitasuna sustatzeko, Euskadi Lagunkoia Sarearen esparruan. Orain arte, programa honen esparruan, 300 prestakuntza tailer baino gehiago egin dira Euskadiko udalerrietan. Pertsona guztiei eta, bereziki, adinekoei kalitateko zerbitzua emateko urrats eta gomendioak dira, kasu askotan doakoak edo oso kostu txikikoak. Horrela, adinekoek hainbat eremutan izan ditzaketen beharrizanak konpentsatzen dira: mugikortasungalera, ikusmenaren gutxitzea, entzumenaren gutxitzea edo narriadura kognitiboa.

Temas

Euskera

Contenido Patrocinado

Fotos

Vídeos