Garoñaren eraispena kontrolatzea eskatu du zentralaren aurkako foroak

Garoña, abuztuaren 2an egindako argazkian./AFP
Garoña, abuztuaren 2an egindako argazkian. / AFP

Bermatu nahi dute "ez dadila Ebrora beste isurketa erradiaktiborik egin" eta "hondakinak ez daitezela bertan gelditu"

2014 urtean sortu zenez geroztik, Garoñako zentralaren behin betiko iritxiera aldarrikatzeko ekintza ugari antolatu dituen Garoñaren kontrako Foroak -talde ekologistak, sindikatuak, mugimendu sozialak, auzokide elkarteak eta beste barne hartzen dituen bilguneak-, ez ditu bertan behera utziko bere egitekoak zentrala itxi eta gero. Ohar baten bidez jakinarazi du, hain zuzen, ezinbestekoa dela eraispen lanen kontrol zorrotza, "eraispenak iraungo duen 10-15 urteetan ez dadin Ebrora beste isurketa erradiaktiborik egin eta hondakinak ez daitezen bertan geratu".

"Lehenengo borroka irabazi ondoren -Garoña betiko ixtea-, orain bigarrena dator: eraispena. Foroak eraispena ziurtasunez eta gardentasunez egitea eskatzen du. Ziurtasuna, ihes erradiaktiborik ez egoteko behar diren ekintza guztiak egin daitezen, hemen ezin delako akatsik egin, herritarren osasuna eta gure baliabideen etorkizuna jokoan dugulako. Eta gardentasuna, inguruko herritar guztiok eraispena behar bezala egiten ari dela ikusi nahi dugulako", diote oharrean.

Izan ere, eraispena 10 urtez edo gehiagoz luza daiteke, eta 600 milioi eurotik gorako kostua izan dezake. Foroak gogoratu du "hortik Iberdrolak eta Endesak 150 baino" ez dutela ordainduko, "gainerakoa herritar guztion lepora izango delarik (beste bidegabekeria bat gehiago)". Horregatik "prozesu luze horretan jarraipena egitea ezinbestekoa da, zaindu behar duen erakundeak, CSNk, beti interes nuklearren alde jokatzen duelako, Garoñari baimena ematean ikusi genuen moduan".

Energia berriztagarriak hobetsi

Horretarako, Garoñaren kontrako Foroak eskatu du Jaurlaritzak eta Arabako Aldundiak sortuko duten batzordean parte hartzea jarraipen lanetan laguntzeko. Batzorde horretan "inguruko udalak, beste herri mugimenduak eta talde ekologistak ere egotea garrantzitsua da", adierazi dute, eta hiru gauza eskatu dituzte zehazki.

Batetik, "Aldundiak edota Jaurlaritzak Ebron aldian aldiko kontrolak egitea, isurketa erradiaktiborik egon ez dela ziurtatzeko, inoiz gertatu izen den moduan". Bigarren eskaera da "CSNren webgunean egin beharreko lanen informazio osoa jartzea (datu teknikoak, epeak, kontrol txosten motak eta maiztasuna…) lanak egin baino lehen, eta egin diren lanen datuak". Eta, azkenik, "hondakinak bertan ez uztea".

Foroaren ustez, "Garoña gelditzeko hainbat urte lan egin ondoren, lehen Lemoizekin egin genuen moduan, bi gauza argi geratu dira: herritarrek ez dutela energia nuklearrik nahi, garestiena eta arriskutsuena delako, eta bigarrena, denak batuta joanez gero, oligopolio elektrikoari irabazi ahal diogula". Horrenbestez, helburutzat jartzen dute "beste herrialdeetako energia nuklearrik ez erostea eta eredu energetikoa aldatzea" eta, norberak har ditzakeek erabakiei dagokienez, hornitzaile handiak uztea eta energia berriztagarriak saltzen duten enpresetara edo kooperatibetara pasatzea".

Horrez gain, "Garoñaren inguruetan lanpostuak sortzen laguntzeko" eskatu diete administrazioei", eta "zentrala egon zen lekuan, energia berriztagarrien instalazioaren bat jartzea, eguzkitiko instalazio bat adibidez".

Temas

Euskera

Fotos

Vídeos