Euskararen Agenda Estrategikoak 2020an 788.100 euskaldun izatea lortu nahi du

Bingen Zupiria Kultura eta Hizkuntza Politikako sailburuaren agerraldia/
Bingen Zupiria Kultura eta Hizkuntza Politikako sailburuaren agerraldia

Dokumentuak bederatzi helburu finkatu ditu euskararen ezagutza areagotzeko, erabilera sustatzeko, hizkuntza eskubideen bermean aurrera egiten jarraitzeko eta euskararen lurraldeen arteko harremanak sendotzeko

Eusko Jaurlaritzak Euskararen Agenda Estrategikoa onartu du 2017-2020 aldirako astearte honetako Gobernu Batzordean. Horren bidez, legealdia amaitu bitarteko hizkuntza politikaren lan ildoak zein helburu estrategikoak zehaztu ditu. Dokumentuak bederatzi helburu estrategiko finkatu ditu euskararen ezagutza areagotzen jarraitzeko, erabilera sustatzeko, hizkuntza eskubideen bermean aurrera egiten jarraitzeko eta euskararen lurraldeen arteko harremanak sendotzeko. Helburu horien artean, 2020rako 788.100 euskaldun izatea lortu nahi du Jaurlaritzak.

Bingen Zupiria Kultura eta Hizkuntza Politikako sailburuak jakinarazi duenez, euskal herritarren euskara gaitasuna ugaritzea; herritarren artean euskararen transmisioa ugaritzea; erabilera handitzea eta kalitatea hobetzea; erakunde publikoen eta pribatuen euskararen erabilera handitzea; herritarren hizkuntza eskubideen babesa bermatzea; euskara biziberritzeko ezagutzaren garapenean (ikerkuntza) eta berrikuntzan (aplikazioa) sakontzea dira agendaren helburuetako batzuk.

Halaber, hizkuntza bizikidetzan oinarritzen den gizarte aktibazioa indartzea; euskararen lurraldea osatzen dugun eragile publiko eta pribatuekin lankidetza berritu eta ugaritzea, eta euskararen nazioartekotzeari eta eleaniztasunaren aldeko konpromisoari jarraipena egiteko ekintza kopurua ugaritzea bilatuko da.

Zupiriaren arabera, "Euskararen Agenda Estrategikoa 2017-2020" dokumentua Jaurlaritzak euskararekiko duen konpromisoaren erakusgarria da.

Bederatzi helburu

Konpromiso horiek lortu ahal izateko, Jaurlaritzak bederatzi helburu estrategiko onartu ditu 2017-2020 aldirako Agenda Estrategikoaren bidez. Horrela, euskal herritarren euskara gaitasuna ugaritzeko helburuan, 2020rako 25 urtetik beherako gazteen %75 euskal hiztun izatea, 788.100 euskaldun izatea (zentsuaren datuen arabera) eta herritarrek euskara ziurtagiriak lortzeko sistema hobetu nahi da.

Bigarrenik, transmisioa ugaritu (2020an %22,5era heltzea) eta etxetik kanpo. Hirugarrenik, euskal herritarren euskararen erabilera handitzea eta kalitatea hobetzea bilatuko da etxean (%21aren gainetik 2020rako) eta lagunartean (%23aren langa gaindituz 2020rako); hezkuntza arautuan (LMH4n, %61,4tik gora; DBH2n %44,7tik gora); lankideekin (%28ra ailegatzea) eta aisialdian.

Laugarrenik, euskara administrazioan zerbitzu eta lan hizkuntza izatea lortiu nahi da administrazioan (euskaraz arreta jaso ahal izatea %100era bermatzea) eta Eusko Jaurlaritzaren mendeko sozietate publikoetan (%54ra iristea), bai eta Bikain ziurtagiria lortzen duten enpresa berriak 40 izatea 2020an (aurten 35 enpresa berrik jaso dute).

Bosgarrenik, Elebide zerbitzura heltzen diren inzidentzien %92 2020rako konponbide egokia izatea eta herritarren hizkuntza eskubideen kontzientzia maila igotzea lortu nahi dira. Seigarrenik, euskararen corpusa garatu nahi da: hiztegiak (83 hiztegi terminologiko izatea 2020rako) eta Euskalterm (Euskaltermen 140.000 kontsulta izatea 2020rako). Gainera, ikerketa kuantitatiboak eta kualitatiboak egin nahi dira, eta arnasguneei eta eremu funtzionalei buruzko azterketak ugaritu.

Zazpigarrenik, Eusko Jaurlaritza egiten ari den lana egoki baloratzen duten herritarrak %65 izatea lortu nahi da (Inkesta Soziolinguistikoaren arabera), bai eta euskararen unibertsoa eta bizipena gizarte osoan duintzea, hizkuntza bizikidetzarako portaera berritzaileak sustatzea eta euskararekiko atxikimendua eta hizkuntzen arteko harremanak sendotzea (euskararen erabilera sustatzearen aldeko jarrera %67ra heltzea).

Zortzigarrenik, euskararen lurraldea osatzen dugun eragile publikoekin eta pribatuekin lankidetza berritu eta ugaritu nahi da, eta azkenik, euskararen nazioartekotzeari eta eleaniztasunaren aldeko konpromisoari jarraipena egiteko ekintza kopurua ugaritu.

Helburu hori lortzeko, Kultura eta Hizkuntza Politikako Sailak eta Hizkuntza Politikako Sailburuordetzak "akuilu lana" egingo dute, eta gainontzeko sailekin lankidetza sustatuko du gobernu programan jasotako euskarari loturiko konpromisoak betetzeko, edozein sailari loturik daudelarik ere.

Temas

Euskera

Contenido Patrocinado

Fotos

Vídeos