Euskal Hedabideen aurtengo kronika aurkeztu dute

Buskal unibertsitateetako errektore eta arduradunek aurkeztu zuten urtekaria/
Buskal unibertsitateetako errektore eta arduradunek aurkeztu zuten urtekaria

Euskal Hedabideen Behategiak, UEU kide berri duelarik, komunikazioaren inguruan gertatutako aldaketen inguruko urtekaria aurkeztu du Durangoko Azokan

Euskal Hedabideen Behategiak 2017ko Urtekaria aurkeztu dute Durangoko Azokan, amaitzen ari den urtean komunikazioaren inguruan gertatutako aldaketen kronika hain zuzen. Aurten, gainera, kide berri bat batu zaio Behategiari: Udako Euskal Unibertsitatea (UEU). UPV/EHUk, Deustuko Unibertsitateak eta Mondragon Unibertsitateak osatu dute, gaur arte, Behategia, Hekimen elkartearekin batera.

Udako Euskal Unibertsitateak Behategiarekin bat eginda, ikerguneak bultzada berria jaso du euskal hedabideen jarduna aztertu eta ikerketa bultzatzen jarraitzeko. Hain zuzen ere, 2018ko urtea giltzarri izango da sektorearentzat ikerketaren alorrean. Euskal hedabideen Datutegiaren bidez, Behategiak inoizko datu funtsik handiena jarri du ikerlarien esku, eta sektoreak etorkizunari begira egin nahi duen gogoetarako ezinbesteko tresna izango da hedabideentzat ez ezik, unibertsitateetako ikertzaileentzat eta administrazioentzat ere.

Kronika landua eta sakona

2017an komunikazioaren alorrean gertatutako aldaketen kronikak abiatzen du Urtekaria, Alberto Barandiaran Hekimeneko zuzendariak egindako berrikuste periodistiko baten bidez. Kazetagintzak jasandako zentsura eta kontrol erasoak hizpide, mugarik gabe hazten ari diren Interneteko kazetaritza ereduak aztertu dira artikuluan. Komunikazio-espazioen eraketaz hausnartzeko bi artikulu dakar, halaber, Urtekariak.

Alde batetik, Mondragon Unibertsitateko HEZIKOM ikerketa taldeko Eneko Bidegain Airek, Andres Gostin Elorzak eta Aitor Zuberogoitia Espillak «Ikus-entzunezko Kontseiluaren eragina komunikazio-espazioaren eraketan: begirada bat Kataluniari» lana sinatu dute. UPV/EHUko NOR ikerketa taldeko Josu Amezaga Albizuk, bestalde, «Aurrera begira jarrita: komunikazio estrategia bat behar dugu» lana proposatu du, etxe barrura begira egin beharreko gogoetarako abiapuntua izateko proposamena.

Gaindegiako Imanol Esnaola Arbiza eta Asier Otxoa de Retanak «Tokiko hedabideen ingurumari sozioekonomikoa, egoera eta balizko bilakaera» artikulua sinatu dute, xehe-xehe deskribatuz komunitate gero eta komunikatuagoetara doan jendarte honetan tokiko komunikabideek dituzten erronkak. UPV/EHUko HGH ikerketa taldeko Amaia Alvarez Berastegi, Alazne Aiestaran Yarza, Beatriz Zabalondo Loidi, Antxoka Agirre Maiora eta Txema Ramirez de la Piscina Martinezek «Euskarazko eta katalanezko hedabideen joera berritzaileak» aztertu dituzte, Berria, Argia, Goiena, Ara, El Punt Avui eta Vilaweb oinarri hartuta.

Komunikazio eredu digitalean barrena, bi artikulu murgildu dira. Alde batetik, CodeSyntax enpresako Josu Azpillaga Labakak eta Mikel Lizarralde Asurmendik sinatutako «Hekimeneko webguneen trafikoaren analisia. Hekimen Analytics tresna oinarri», euskarazko komunikabideen Interneteko jardunaren nolakotasuna argitzeko: saio kopurua, saioen sakontasuna, trafiko iturriak, gailuen alderaketa, mugikorren indarra eta beste. Bestetik, «Euskarazko komunikabideak Facebook sare erraldoian» lanean, Behategiko koordinatzaile Libe Mimenzak euskarazko hedabideek sare sozial horretan dituzten ezaugarriak aletu ditu. Azkenik, EiTBko ikerketa saileko arduradun Rebeka Garai Basterretxeak eta UPV/EHUko NOR ikerketa taldeko kide Edorta Arana Arrietak elkarrekin idatzitako artikuluan telebista da protagonista. «Adinak eta euskarak telebista ikusteko ohituretan daukaten eragina» lanak egungo euskarazko audientziaren profila ezagutzeko ahalegina dakar, hain zuzen ere horixe baita lehen urratsa euskarazko emisioen audientzia zabalagoa eskuratzeko.

Urtekaria Durangoko Azokan bertan eskura daiteke, euskal hedabideen erakusmahaietan, eta baita Behategia.eus atarian ere.

Contenido Patrocinado

Fotos

Vídeos