Errefuxiatuei harrera egiteko programak ezagutzera joan da Jaurlaritza Londresera

Monika Hernando eta Jonan Fernandez, artxiboko argazkian./MIKEL FRAILE
Monika Hernando eta Jonan Fernandez, artxiboko argazkian. / MIKEL FRAILE

Jonan Fernandezek eta Monika Hernandok ordezkatzen dute Jaurlaritza babes komunitarioko programen garapenari eta inplementazioari buruzko mintegi tekniko batean

Jonan Fernandez Giza Eskubide, Bizikidetza eta Lankidetzaren idazkari nagusia eta Monika Hernando Biktimen eta Giza Eskubideen zuzendaria Eusko Jaurlaritza ordezkaritzen ari dira egunotan Londresen, babes komunitarioko programen garapenari eta inplementazioari buruzko mintegi tekniko batean. Errefuxiatuei harrera egiteko programak aztertzen ari dira mintegian.

Eusko Jaurlaritzak jakinarazi duenez, Kanadako Global Refugee Sponsorship Iniciative ekimenak eta Britainia Handiko Barne Arazoetarako Ministerioak batera antolatutako mintegia da, eta hainbat herrialdetako ordezkariak bildu dira, hala nola Argentina, Austria, Brasil, Kanada, Alemania, Irlanda, Espainia, Erresuma Batua, Uruguai eta Euskadi, estatuz azpiko erakunde bakar gisa. Caroline Nokes Erresuma Batuko Migrazioko ministroa bileraren buru da.

Ostegun honetan amaituko den topaketak «errefuxiatuei harrera egiteko eta babesa emateko proposamen desberdinak azaltzeko eta munduko beste herrialde batzuetan gai horretan ematen ari diren aurrerapausoak ezagutzeko balioko du».

Eusko Jaurlaritzak adierazi duenez, «behin baino gehiagotan azaldu du bere konpromiso solidarioa errefuxiatuekiko, baita errefuxiatu gehiago eta hobeto hartzeko aukera emango duten bide berriak aztertzeko asmoa ere. Duela hilabete batzuk hasi dira gauzatzen Auzolana esperientzia Euskadiko zazpi udalerritan, eta azken asteotan Auzolana II izango litzatekeenaren diseinuan ari dira lanean, Babes Komunitarioa eredutzat hartuta«.

Kanadako eredua

Zehazki, errefuxiatuentzako babes komunitarioko programen bitartez Kanadako Gobernuak abian jarritako ekimena aztertuko da Londresen. Formula horrek ahalbidetu du errefuxiatuak berrezartzeko estatuko programak osatzea eta errefuxiatuen kopurua gehitzea, herritarren, GKEen edo beste talde interesatu batzuen inplikazioaren eta auto-antolamenduaren bitartez. Ekimen horien bitartez, herritarrak taldetan antolatu eta babes ekonomikoa, soziala eta emozionala emateko konpromisoa hartzen dute, finkatutako aldi batean zehar, urtebetekoa normalean.

Hala, ereduak herritarren inplikazio formula bat baino gehiago jasotzen ditu, errefuxiatuak hartu eta integratzeko prozesuez arduratu daitezen: babes akordioen titularrak (erakunde erlijiosoak edo humanitarioak dira, solidaritatearen eremuan esperientzia zabala eta ziurtatua dutenak, maila nazionalean, normalean); G5 (bost pertsonak edo gehiagok osatutako taldeak, elkartu eta antolatu egiten direnak errefuxiatu bat edo gehiago babesteko erantzukizuna hartzeko); komunitateko babesleak (herritar bat edo gehiago, erakunde baten babesean, tokiko mailan normalean, helburu horretarako ere antolatzen direnak).

Hartzen dituzten erantzukizunei dagokienez, ereduak hiru babes modalitate jasotzen ditu: babes komunitarioko taldeak babes ekonomiko guztien kargu egiten dira (12 hilabete) eta harrera eta integrazio prozesu osoaz arduratzen dira; babes taldeak eta gobernuak %50ean partekatzen dute babes ekonomikoa, eta babes sozialaz eta harrera eta integrazio prozesuaz arduratzen dira babesleak; gobernua babes ekonomiko osoaren kargu egiten da (bi urte), eta babes sozialaz eta harrera eta integrazio prozesuaz arduratzen da babes taldea.

Temas

Euskera

Contenido Patrocinado

Fotos

Vídeos