Ez dira jolasten ikasteko, baina jolas eginez ikasten dute

Ikastetxe bateko jolas patioa./REUTERS
Ikastetxe bateko jolas patioa. / REUTERS

Haur Hezkuntzako 380 hezitzaile elkartuko dira larunbat honetan gaiaren inguruan Eibarren egingo den jardunaldian

Haur Hezkuntzan diharduten 380 hezitzaile inguru elkartuko dira larunbat honetan apirilaren 14an, Euskal Herriko Unibertsitatearen Eibarko egoitzan, Eusko Jaurlaritzako Hezkuntza Sailak 'Haur Hezkuntza: bizitzako oinarrien etapa' lelopean antolatu dituen hiru jardunaldietan lehenean. Hezkuntza Sailaren Berritzegune prestakuntzan eta hezkuntza berrikuntzan laguntzeko zentroak antolaturiko ekimenaren lehen saioak jolasa izango du ardatz nagusi, jolasak Haur Hezkuntzako ikasleen garapen pertsonalerako duen garrantzia, hain zuzen.

Antolatzaileek jakinarazi dutenez, gaur egun, hezkuntza arloko adituak bat datoz esaldi honekin: «haurrak ez dira jolasten zerbait ikasteko, baina jolas eginez ikasten dute». Esaldi horrek laburbiltzen du larunbatean Eibarren izango den topaketaren norabide nagusia. «Izan ere, jolasaren bidez interpretatzen du umeak ingurua, eta jolasak ahalbidetzen dio errealitatea ulertzeko behar duen askatasun hori«, adierazi dute.

Horrela, hasierako azalpen teorikoen ondotik, Itsaso Pagoaga Mondragon Unibertsitatean jolasaren inguruko ikasgaia irakasten duen hezitzaileak egitarauak jasotzen dituen tailer praktikoak emango ditu. 'Argi tailerra' tailerrean, argiarekin jolasteko eta esperimentatzeko erak azalduko ditu, linternak, proiektoreak, argidun mahaiak nahiz ohiko beste zenbait tresna erabiliz. Jolas hauek haurren sormena garatzeko aukera ematen dute, objektu eta bolumenak argiaren aurrean jarrita, perspektibarekin eta itzalekin jolastuz.

Horren ondoren, Haur Hezkuntzako umeentzako mahai joko egokiez tailer bat eskainiko du. Azkenik, 'Mundu txikiak' izeneko tailerrean, material ez estrukturatuak deiturikoek (alegia, harri, makila, oskol, poto, egurrezko blokeak) umeen sormena garatzeko duten potentzialtasuna aztertuko da.

Beste bi saio

'Haur Hezkuntza: bizitzako oinarrien etapa' goiburuko jardunaldi sortak maiatzean eta ekainean jarraipena izango du. Maiatzaren 26an, Eibarko egoitzan bertan, irakurketa eta idazketaren inguruko jardunaldia izango da, Jose Javier Azpitarte eta Nere Inda Hezkuntza Saileko Berritzeguneetako aholkulariekin.

Ekainaren 27an aldiz, hitzordua Azpeitian izango da. Ebaluazioa eta familiarekin elkarlana izango dira ardatz saio hauetan, Malagako Unibertsitateko Didaktika eta Eskola Antolaketako katedradun Miguel Angel Santos eta Baztango haur eskolako zuzendari Kristina Goñi Etxenikeren ardurapean.

Jardunaldi sorta honen helburuak dira, batetik, Haur Hezkuntzan zutabe diren arloen inguruan aritzea eta hausnarketa egitea, profesional bakoitzari bere egunerokotasunarekin lotura estua duten gaiak aurkitzeko parada emanez, eta, bestetik, profesionalon arteko ezagutza eta trukaketa ahalbidetzea.

Temas

Euskera

Contenido Patrocinado

Fotos

Vídeos