Diario Vasco

52 ikastolatan abiatu da jazarpenaren aurkako KiVa programa

Aditu finlandiarrek aurkeztu zieten programa ikastoletako ordezkariei iazko apirilean.
Aditu finlandiarrek aurkeztu zieten programa ikastoletako ordezkariei iazko apirilean. / USOZ
  • LH-ko 18.000 ikaslerengana heldu da Eguberrietako oporraldia amaitu ostean, baina helburua da programa ikastola guztietara hedatzea

2016ko apirilaren azken egunetan, hitzarmena sinatu zuten Ikastolen Elkarteak eta Finlandiako Turkuko Unibertsitateak ikasturte berriarekin batera herrialde hartan horren arrakastatsua izan den eskola jazarpenaren aurkako programa ikastoletan ezartzeko. 52 ikastolak hartu zuten hasiera batean programa martxan jartzeko erabakia eta, prestakuntza eta egokitzapen lanak burututa, ikastola horietan abiatu da KiVa urte berriarekin batera.

Guztira, 18.000 ikasleri eragingo die arreta nagusia prebentzioan eta eskola komunitatea osatzen duten guztien arduran jartzen duen programak. Ikastolen Elkarteak ohar baten bidez jakinarazi duenez, «52 KiVa ikastola ditugu, beraz, gaurtik aurrera. Lehenbiziko 52ak; izan ere, programa Euskal Herriko ikastola guztietara hedatzea baita helburua».

Lehen Hezkuntzako 18.419 ikasle hasi dira parte hartzen programa honetan. Mundu mailan eskola jazarpenari aurre egin eta hura murrizteko programarik eraginkorrena da KiVa, Finlandiako Turkuko Unibertsitateak garatutakoa. KiVak ikastola komunitate osoa hartzen du bere baitan; ikasleak, irakasleak, langileak eta gurasoak. Hartara, eskola jazarpenari aurre egitea guztien eginkizuna dela azpimarratzen du. Helburua, noski, ez da jazarpenak murriztea, baizik eta bakar bat gehiago ere ez gertatzea. Ikastolek xede hori lortzeko borondate irmoa dute.

Hurrengo egunetarako, adierazi dutenez, ekitaldi bereziak antolatu dituzte ikastolek, KiVa programa ezagutarazi eta ikastoletan txertatzeko.

Temas

Recibe nuestras newsletters en tu email

Apúntate