Diario Vasco

Beka eta laguntzen sistema aldatzea proposatu du EH Bilduk

  • Unibertsitatez kanpoko hezkuntzari dagokion proposamenaren arabera progresiboak izan beharko lirateke eta laburtu egin beharko lirateke emateko epeak

EH Bilduk legez besteko proposamena aurkeztu du Legebiltzarrean unibertsitateaz kanpoko ikasleentzako bekak eta laguntzak emateko sistema aldatzeko. Koalizioak ohar baten bidez azaldu duenez, «Jaurlaritzak orain erabiltzen duen prozedurak ez du laguntza horien xede nagusia betetzen, alegia, hiritar guztien hezkuntzarako eskubidea eta irakaskuntzarako askatasuna bermatzea». Hori dela eta, EH Bilduk «doakotasunaren bidean urrats bat eman nahi du beka eta laguntzen sistema aldatuz». Zehazki, Rebeka Uberak proposatu du beka eta laguntzen deialdia eta ebazpena matrikulazio epea amaitzen denetik ikasturtea hasi bitartean egin daitezela eta familiek «diru-laguntzak ikasturtea hasi eta hilabeteko epean kobratu ditzatela gehien jota».

Orain, deialdia behin ikasturtea hasita egiten da eta sei hilabeteko epean ebazten dira laguntzak, eta «horrek -ohartarazi du Uberak- familia asko eta asko, bereziki egoera zaurgarrienean daudenak, egoera dramatiko eta gogorretara kondenatzen ditu, zorpetzeraino ere iritsiz euren seme-alabak matrikulatu ahal izateko, eta horrek, argi dago, ondorioak ditu euren eskolaratze, integrazio zein heziketa prozesuan». EH Bilduko legebiltzarkidearen iritziz, «bekak emateko prozeduran erabiltzen diren epeak laburtzeak egoera hori konponduko luke neurri handi batean».

Halaber, EH Bilduren proposamenak «laguntzen ekitatean sakontzea du helburu, bekak progresiboagoak izan daitezen, premia bereziak dituzten ikasleak eta familiei lehentasuna emanda». Izan ere, «orain laguntzak gehien behar dituzten familiek eta gainerakoek jaso ditzaketen bekak berdinak dira».

Temas

Recibe nuestras newsletters en tu email

Apúntate