EAEko biztanleen erdiari ez zaizkie Gabonak gustatzen

Jatea da gehien estimatzen dugun Gabonetako ohitura. Argazkian, denetariko turroi eta gozoak Donostiako gozotegi batean./
Jatea da gehien estimatzen dugun Gabonetako ohitura. Argazkian, denetariko turroi eta gozoak Donostiako gozotegi batean.

Estatuko Autonomia Erkidego guztietako datuak kontuan hartuta, jai hauek gutxien estimatzen ditugun herritarrak gara

M. IMAZ

Ebenezer Scrooge jaunari, Charles Dickensen 'Eguberri kanta' ezaguneko pertsonaiari, Gabonek ere ez zioten bihotza berotzen, are gutxiago beratzen. Eguberriak gogoko ez dutenen ikur bilakatu den agure zeken eta xuhurra EAEko biztanlea izan liteke, Gabonetako Behategia delakoaren aurreneko inkestaren arabera, Gabonzale kopuru txikiena duen autonomia erkidegoa baita Euskadi. Ipsos etxeak Suchard enpresarentzat egin duen inkestak (turroia gustatzen zaigula dio, jakina, batez ere txokolatezkoa...), nabarmendu du Euskadiko biztanleen %48k ez dituztela batere gogoko Gabonak. Estatuko beste erkidego batzuetakoak baino askoz ere 'scrooge'-agoak gara, alegia, batez besteko datua %33koa baita. Oso-oso zaleak, Estatu mailan betiere, %26 dira, eta zeharo 'gabonfobikoak', berriz, %6.

EAEko biztanleei gutxien gustatzen zaizkien Gabon giroko jardueren artean opariak erostea dago. Ia erdiak (%48) ez dute batere disfrutatzen zeregin horrekin, eta %34ri opariak irekitzea ere ez zaie gustatzen, ez Olentzerok ekarritakoak, ezta Erregeenak ere. Bide nabar, esan daiteke gehienek bigarren data horretan nahiago dituztela opariak.

Edonola ere, atsegin ez ditugun gauza eta jardueren zerrenda luzea da eta, punturen batzuetan, nahiko bitxia. Hala, %58ari ez zaizkio gustatzen Gabonetako motiboak (zehazki, elur-oreinak) dituzten jertseak (estatu mailan %23koa da portzentajea). Telebistako saio bereziak ikusi ere ez dituzte egiten %59k (oso antzekoa da Estatuko batez bestekoa), eta gutxien gustatzen zaizkigunak Gabon eta Gabon Zaharreko musika saioak dira.

Loteriak ere ez gaitu pozez zoratzen. Estatu mailan %62ri asko gustatzen zaie. EAEn justu kontrakoa gertatzen da: portzentaje hori dagokio batere gustatzen ez zaien herritarrei. Beste horrenbeste esan daiteke gabon-kantez: %58k ez dituzte batere atsegin, eta bereziki ernegatzen gaitu (hori diote %69k) haurrak kantuan eta eskean ikusteak.

Hala ere, %72k esaten dute giro polita sortzen dela kaleetan, eta hamarretik ia zortzi familiarekin mahaiaren bueltan esertzeko deseatzen egoten dira. Ez du argitzen irrika hori familiarengatik den, edo jan-edanak eragina, sabelari lotuak baitira gehien estimatzen ditugun Gabonetako ohiturak.

Hori bat, jale hobeak gara prestatzaileak baino. Izan ere, %80k dio asko disfrutatzen duela egun hauetako otorduekin, baina %14ri bakarrik gustatzen zaio sukaldatzeaz, mahaia prestatzeaz eta hori jasotzeaz arduratzea. Gozozaleak ere bagara, gozoak egiten dituen enpresak agindutako inkestaren arabera: %66rentzat, alegia, ez omen dago Gabonik turroirik gabe (hamar puntu txikiagoa da batez besteko datua).

Temas

Euskera

Contenido Patrocinado

Fotos

Vídeos