Bost Kontinenteetako Landareen Azokak 36 ekoizle bilduko ditu

Erakutsiko dituzten landare gehienak ezezagunak dira gure artean, hemen erraz erein daitezkeen arren / Reuters

Leioako Arboretum parkean egingo dute landare apaingarrien espezieak eta motak landatzen dituztenen arteko harreman komertzialak zabaltzeko azoka

Euskal Herriko Unibertsitateak (EHU) Bost Kontinenteetako Landareen hirugarren Azoka antolatu du. Euskal Herriko, Espainiako eta Frantziako 36 ekoizlek mundu osoko landareen aukeraketa bat erakutsiko dute larunbatean eta igandean, irailaren 30ean eta urriaren 1ean, Leioako Arboretum parkean.

Bizkaiko Aldundiko arduradunek iragarri dutenez, Erandio eta Leioako udalen laguntzarekin antolatzen da azoka, eta aurtengo edizioan, basoko hazien erakusketa bat eta Martintxuneko foru mintegiko landareen erakusketa bat egongo dira. Mintegi horretako landareak interes bereziko aldeak lehengoratzeko erabiltzen dira.

Horrela, landare apaingarrien espezieak eta motak landatzen dituztenen arteko harreman komertzialak zabaltzeko topagune izango da Arboretum. Landare gehienak ezezagunak dira gure artean, hemen erraz erein daitezkeen arren. Horrela, besteak beste, Gipuzkoa, Frantzia, Madril, Santander, Nafarroa, Valentzia, Asturias, Malaga, A Coruña eta Bartzelonako ekoizleek era guztietako espezieak ekarriko dituzte azokara: landare karniboroak, kaktusak, landare zukutsuak, orkidea tropikalak, bildumako zitrikoak eta arte topiarioko figurak (landareak inausketako artaziez ebakiz egindako figurak).

Azokak landare horien landaketari buruzko teknika eta ezagutzak partekatzeko balio izango du. Bestalde, edizio honetan erakusketa osagarri bi egongo dira, eta enpresa batek zuhaitzen gaixotasunak sendatzeko eta prebentziorako teknika eta produktu berritzaileak erakutsiko ditu.

Doako autobusak egongo dira azokara joateko, 10:00etatik 18:00etara (azoka ordutegi horretan egongo da zabalik), Astrabuduako eta Leioako metro geltokietatik. Sarrerak euro bat balio du, baina 12 urtetik beherako neska-mutilak doan sartu ahal izango dira.

Azokara joango diren bisitariek Arboretumeko bidezidorren sareaz ere gozatu ahal izango dute. Guneak 19 hektarea ditu eta bost kontinenteetako 130 espezietako 1.700 zuhaitz biltzen ditu. Hori dela eta, Bizkaiko naturagune garrantzitsuenetako bat da.

Temas

Euskera

Fotos

Vídeos