Baionako Bernat Etxepare Lizeo berriaren inaugurazioa egin dute

Uriarte eta Zupiriaz gain, Akitaniako presidentea, Baionako alkatea, Euskal Elkargoko presidentea eta Seaskako presidentea ere bertan izan dira
Uriarte eta Zupiriaz gain, Akitaniako presidentea, Baionako alkatea, Euskal Elkargoko presidentea eta Seaskako presidentea ere bertan izan dira

Cristina Uriarte Hezkuntza sailburua eta Bingen Zupiria Kultura eta Hizkuntza Politikako sailburua bertan izan dira eta "euskararen biziberritze prozesuan hezkuntzak duen garrantzia" nabarmendu dute

Eusko Jaurlaritzako ordezkariek Iparraldeko euskarazko hezkuntzaren etorkizunerako "hain garrantzitsua" den proiektua babestu nahi izan dute, Bernat Etxepare Lizeoaren irekiera hain zuzen. Horregatik, Cristina Uriarte Hezkuntza sailburua eta Bingen Zupiria Kultura eta Hizkuntza Politikako sailburua lizeo berriaren inaugurazioan izan dira gaur, Baionan.

Iparraldean euskaraz ikasteko aukera eskaintzen duen lizeo bakarra da 1990ean sortutako Bernat Etxepare Lizeoa, 15 eta 18 urte bitarteko gazteentzat euskara hutsean ikasteko abagune bakarra. Gaurko ekitaldian, gainera, lehenengoz lanbide-heziketa sail bat inauguratu dute, euskaraz ikasteko aukerak areagotuz. Beraz, bi urteko lanen ostean, Bernat Etxeparek aurpegi eta eskaintza eraberritua erakutsi du gaur.

Zupiria sailburuak euskararen biziberritze prozesuan hezkuntzak duen garrantzia nabarmendu nahi izan du: "Eusko Jaurlaritzarentzat oso albiste garrantzitsua da, proiektu honek euskararen erabilera bultzatzen lagunduko baitu hezkuntzaren bitartez. Euskal Autonomia Erkidegoan badakigu zer garrantzia duen hezkuntza sistemak, bere maila guztietan, euskaldunen komunitatea handitzeko. Iparraldean bide horretan lanean ari direla ikusteak asko pozten gaitu. Era berean, funtsezkoa da euskara lanbide-heziketaren mundura eramatea, baita lan mundura eta arlo sozioekonomikora ere. Helburu hori lortzeko oso garrantzitsua izango da gaur abian jarri den proiektua".

Gaurko ekitaldian, besteak beste, Akitaniako presidente Alain Roussetek, Baionako alkate eta Euskal Elkargoko presidente Jean Rene Etchegarayek edota Seaskako presidente Paxkal Indok hartu dute parte.

Goranzko joera

Irakaskuntza elebidunak gero eta ikasle gehiago ditu Ipar Euskal Herrian. Eskola publikoko sare elebidunean 5.800 ikasle arituko dira haurtzaindegian eta lehen mailan (maila horretako ikaslego osoaren herena), eta 1.000 bigarren mailan.

Lanbide Heziketa dual honek, ikasiz lan egiteko eta lan eginez ikasteko balioko diela ikasleei defenditzen dute. Horretarako, enpresekin harreman estua edukiko du zentro honek, lan poltsa propioekin. Ikasle ia guztiek lana aurkitzea da asmoa, ikasketak amaitu orduko. Atzerrian lan egiteko aukera ere izango dute Erasmus+ programen bitartez.

Erdi mailatik goi mailara eta goi mailatik unibertsitatera igarotzeko aukera edukiko dute ikasleek horrela, formazio osagarriak ere eskainiko dituztelarik: zertifikazio profesionalak (Hobetuz, Lanbide) eta bestelakoak (EGArako prestakuntza…).

Ekainaren 5etik 16ra bitartean egongo da irekita aurre-matrikulatzeko aukera. Matrikulazioa, berriz, uztailaren 13tik 19ra bitarteanegin beharko da.

Temas

Euskera

Fotos

Vídeos