Azken hamarkadako Europako zinema kokalekurik onena izateko hautatu dute Gaztelugatxeko Doniene

Gaztelugatxeko Doniene/Fotolia
Gaztelugatxeko Doniene / Fotolia

Bozka bidez hautatuko dute 'Hamarkadako Europako zinema kokalekurik onena' izateko lehiatuko diren 11 tokien artean, azaroaren 7an

DVDonostia

European Film Commission Network (EFCN) sareak Gaztelugatxeko Doniene hautatu du 'Hamarkadako Europako zinema kokalekurik onena' izateko lehiatuko diren 11 tokien artean, Europako kokalekurik onena sariaren barruan, 2016ko udazkenean egin zen 'Game of Thrones' telesailaren filmazioaren ondorioz.

"Kostaldeko kokapen enblematikoa lehiaketako finalisten zerrendan egotearen ondorioz, Bizkaia nazioartean aintzatetsi dute filmak, telesailak nahiz edozein ikus-entzunezko ekoizpen filmatzeko erreferentziazko toki gisa", Bizkaiko Foru Aldundiak nabarmendu duenez.

Hautagaitzak jakin ondoren, Europako ikusleek izango dute azken hitza, haiek emandako botoen bitartez aukeratuko baita irabazlea. Europa osoko ikus-entzunezko sektorearen eta zinemako profesionalak biltzen dituen Cineuropa plataformaren webgunean egingo da bozketa: www.cineuropa.org. Parte hartzaileek urriaren 25era arte eman ahal izango dute botoa, eta hiri, uharte, espazio historiko nahiz arkeologiko, mendi zein haran ikusgarri eta azken hamar urteotan telesail edo dokumentalen kokaleku izan diren beste toki batzuen artean aukeratu beharko dute.

Bilboko Udalak eta Bizkaiko Aldundiak bizkaitarrak eta euskal herritar guztiak animatu dituzte Gaztelugatxeko Donieneren aldeko botoa eman dezaten. "Sari horri esker filmak nahiz telesailak filmatzeari lotutako turismoko eta sormenaren industriako aukera espazio gisa Bizkaiak duen irudia indartuko da nazioartean", ziurtatu dute.

Hamaika finalista

Finalistak 11 dira eta hautaketa bi fasetan egin da. Lehenengo fasean, EFCN sareko kide den filmen batzorde bakoitzak bere lurraldean dagoen kokaleku bat proposatu zuen; bigarren fasean, berriz, Cineuropako aditu eta kritikoen talde batek azken zerrenda erabaki zuen, eta zerrenda horretan daude, Gaztelugatxerekin batera, Antiparos uhartea (Grezia), Wroclaw hiria (Polonia), Dubrovnik hiria (Kroazia), Kastilac gaztelua (Kastela, Kroazia), Gorlitz hiria (Alemania), Mínima irla (Sevilla, Espainia), Karakalaren Termak (Erroma), Val Senales glaziarra (Trentino-Adige Garaia, Italia), Valldal-Juvet Landscape hotela (Norvegia) eta Viena hiria.

"Hamarkadako Europako zinema kokalekurik onena" sariaren irabazlea azaroaren 7an emango da jakitera, European Film Commission Network sarearen hamargarren urteurrenaren ospakizun ekitaldian; Bruselan egingo da, Europako Parlamentuko egoitzan.

Temas

Euskera

Contenido Patrocinado

Fotos

Vídeos