Diario Vasco

Euskara «berezko hizkuntza bat gisa garatzeko eta aztertzeko» akordioa

Andres Urrutia euskaltzainburua eta Ana Ollo kontseilaria.
Andres Urrutia euskaltzainburua eta Ana Ollo kontseilaria. / EUSKALTZAINDIA
  • Nafarroako Gobernuak eta Euskaltzaindiak lankidetza-hitzarmena sinatu dute 2017rako

Ana Ollo Nafarroako Gobernuko Herritarrekiko eta Erakundeekiko Harremanetako kontseilariak eta Andres Urrutia euskaltzainburuak Nafarroako Gobernuaren eta Euskaltzaindiaren arteko lankidetza-hitzarmena sinatu dute astelehen honetan Iruñean. Horren arabera, 149.000 euroko ekarpena egingo dio Foru Erkidegoko Gobernuak Akademiari. Horri esker, «kultura-proiektuak egiteko lankidetzarekin jarraituko dute 2017. urtean» erakunde biek. Xede horretarako, lankidetzaren oinarri orokorrak ezartzen eta bi entitateek hartuko dituzten konpromisoak arautzen dituen hitzarmena berritu dute bi erakundeek, Iruñeko Nafarroako Jauregian.

Ekitaldian Iñaki Caminoren 'Amiküze eskualdeko eskuara' liburua aurkeztu da, hain zuzen, iaz sinatutako hitzarmenaren barruan egin dena. Mendaur bildumaren barruan argitaratu da eta Euskaltzaindiak eta Nafarroako Gobernuak bilduma hori abian jarri zutenetik hamaikagarren lana da. Egileak azaldu duen moduan, Nafarroa Behereko herri horren (Amiküze) euskararen azterketa filologiko sakona egiten du bertan.

Aurkezpenean hauxe nabarmendu du kontseilariak: «Normalizatzeko eta lankidetzan aritzeko helburuari erantzuten dio, euskara gure Komunitateko berezko hizkuntza bat gisa garatzeko eta aztertzeko». Horrez gain, adierazi du ez duela nahi «euskara laborategi filologiko batean aztertu eta gordetzen den erlikia eta kultur altxor bat izatea». Horregatik, Gobernuak Euskaltzaindiaren helburu bera duela nabarmendu du, hots, «gure hizkuntzaren gizarte-estatusaz arduratzea».

Bere aldetik, Andres Urrutia pozik agertu da hitzarmen berriak ahalbidetuko dituen egitasmoengatik. «Nafarroako Gobernuarekin betidanik izan dugun elkarlanerako joera berretsi dugu gaur, eta pozgarria da laster ehun urte egingo dituelako Akademiak, eta mendeurren horretan ere gure ondoan ditugulako Nafarroako erakundeak, bere sorreran eragin zuzena izan zutenak».

Nafarroako Foru Aldundia Euskaltzaindiaren sortzaileetako bat izan zen 1918. urtean, euskara garatzeko helburuarekin. Harrezkero, Nafarroako Gobernuaren eta Euskaltzaindiaren arteko harremanak ez du etenik izan. Horri esker, kultura-erakundearen sustapena eta laguntza izan duten hainbat ekimen abian jarri dira.

Temas

Recibe nuestras newsletters en tu email

Apúntate