Diario Vasco

Usadioak mantentzeko 2.000 ardi mendira bidean

Artzain Egunaren aurkezpenean, duela egun batzuk Donostian
Artzain Egunaren aurkezpenean, duela egun batzuk Donostian
  • Asteazkenean Artzain Eguna ospatuko du Ordiziak

Ordizian aurtengo azoka berezien egutegiari hasiera emango dion Artzain Eguna ospatuko da asteazkenean. Artzainak eta gazta izango dira ardatz, besteak beste, Idiazabal gaztaren denboraldi berriaren aurkezpen ofiziala egingo da, Luis Irizar, Euskal Sukaldaritza berriaren sustatzaileen ordezkariaren eskutik. Plaza Nagusian eta inguruetan egiten den asteroko azokari gazta, Goierriko produktu eta Gipuzkoako artisauen saltokiak gehituko zaizkio.

Garagartza plazan, 9.00etan hasita, latxa arrazako 50 bat artzainen aharien erakusketa-lehiaketa eta salmenta egingo da. Bertan, 200 abelburu inguru izango dira ikusgai. Bi motako animaliak izango dira lehiaketa-erakusketa horretan: latxa mutur-gorriak eta latxa mutur-beltzak. Mutur-gorrien kasuan Aralar, Ernio, Izarraitz, Gabiria, Azpeitia edo Donostialdeko animaliak izango dira ikusgai. Mutur-beltzetan, berriz, Urbia, Elgoibar, Legazpi, Ordizia, Zerain eta Oñati ingurukoak.

Garagartza Plazan gazta egingo da zuzenean, haurren gozamenerako, nagusiki. Beste ekintzen artean daude, esaterako, mamia dastatzea eta eguerdi parteko ardien ile-mozketa, makinaz zein eskuz.

10.30tan eta artaldeen zeharkaldiaren aurretik, Jakes Etxean, artzainaren omenez Ordiziako udalak jarriko duen figuraren aurkezpen ekitaldia ospatuko da. Javier Arrieta eskultore zegamarrak landu du harrizko figura. Goizeko 11.00ak aldera, garai batean artaldeak negua bukatzen zenean mendira joateko herri barrutik igarotzen ziren bezala, herrian barrena ibiliko dira 2.000 ardi baino gehiago.

Ordiziako Udaletxeko Batzar aretoan, Luis Irizar, Euskal Sukaldaritza Berriaren sustatzaileen ordezkaritzan gazta gaztea ebakiko du. Baina, aldez aurretik, Niko Osinalde, Goiturreko zuzendariari omenaldia egingo zaio, Euskal Herrian naiz Euskal Herritik kanpo Idiazabal Gaztaren difusioan egindako lanagatik. Baita ere, gaztaren erregulartasun-kalitate sariak banatuko zaizkie Olaberriako Xanti Etxezarreta artzainari eta Sunbillako (Nafarroa) Luis Vicente Larrarteren Lizun gaztandegiari ere.

Azkenik, arratsaldeko 17.00etan, familientzako Idiazabal gazta dastatze gidatua dago antolatuta D´elikatuz zentroan. Izen-ematea delikatuz@ordizia.eus helbidean eta 943882290 telefonoan.

Temas

Recibe nuestras newsletters en tu email

Apúntate