Diario Vasco

EGA eta gainerako azterketak egokitzeko urtea

Artxiboko argazkian, HABEko azterketa bati dagozkion zerrendei begira.
Artxiboko argazkian, HABEko azterketa bati dagozkion zerrendei begira. / LUSA
  • Eusko Legebiltzarrak hala eskatuta, euskararen ezagutza egiaztatzeko tituluak berrikusi eta eguneratzeko proposamena aurkeztu zuen iaz Eusko Jaurlaritzak

EGA euskararen gaitasun agiria 2017ko aurreneko deialdian lortu nahi dutenek zabalik dute astelehenaz geroztik eta hilaren 23ra arte izena emateko epea. Europako Erreferentzia Marco Bateratuko C1 maila azterketa libre horren bidez egiaztatu nahi dutenei ez zaizkie baldintza bereziki zorrotzak ezartzen: 17 urte beteta eduki behar dituzte, edo urtean zehar bete, eta 24 euro ordaindu. Ez da diru asko, nahiz eta aurten dezente garestitu den, %33, iazko lehen deialdian parte hartzeko 18 euro ordaindu behar baitziren orduan kaleratutako informazio agirien arabera. Merkea da, hala ere, baliokide duen Cambridge Advanced Certificate in English-ekin konparatuta, azterketa hori egiteko matrikula 200 euro ingurukoa baita.

Eskerrak den merkea, azterketa gainditzen dutenen kopurua %25aren bueltan dabilenez izena ematen dutenen hiru herenek etekin txikia ateratzen baitiote inbertsioari. Eta, azken bospasei urteotan batez beste 12.000 bat lagun matrikulatzen direla kontuan izanda, jende asko pasatzen da esperientzia etsigarri horretatik, nahiz eta murrizten doan EGAren atzetik abiatzen direnen kopurua. 2012tik aurrera ikasketak euskaraz egin dituztenei azterketa eta titulu beharrik gabeko maila-aitortza egiten zaienetik, hasi da baretzen 'EGAmania'. Batez ere unibertsitatez kanpoko ikasketak amaitu bezain pronto, askotan berariazko prestakuntzarik gabe, titulu horren bila doazenen artean. Hala ere, asko dira urtero azterketak jartzen duen langarekin -batez ere, atariko probakoarekin- estropezu egin eta EGAdunen eremutik at gelditzen direnak.

Egokitu beharra

EGAren emaitza kaskarrak aspalditik ziren ezagunak, baina aurreko legealdian iritsi ziren zurrunbilo politikoaren erdira, eztabaida batik bat PSE-EEk akuilatu zuelarik. Beste agenda batzuetan ere bazegoen apuntatua, dena den, euskararen ezagutzaren egiaztapen-sistema berrikusi eta egokitu beharra. 2008an eragile desberdinek emandako agiri ugarien oihana garbitu, ordenatu eta Europako Erreferentzia Marko Bateratura egokitzen hastearekin batera oso argi geratu zen, alegia, ezinbestekoa zela gauzak birpentsatzen eta aldatzen hastea.

Azkenean, 2015eko urrian, Eusko Legebiltzarrera iritsi zen gaia, osoko bilkurara. PSE-EEk uda partean aurkeztutako proposamena oinarri hartuta, erdibideko mozio bat adostu zuten sozialistek, EAJk eta EH Bilduk eta, azkenean, aho batez onartu zuen osokoak Eusko Jaurlaritzari euskara azterketen 'orientabidea eta edukiak' berrikus zitzan eskatu zion testua, PP eta UPyD ere alde azaldu zirelarik.

Ordurako martxan zen Tituluen Baliokidetzearen Jarraipen Batzordearen esku jarri zuen egitekoa Jaurlaritzak, EGAren eta gainontzeko agiriei buruzko azterketa egiteko lantalde bat sortuz. Talde horren lanaren emaitza 2016ko apirilean aurkeztu zuen Legebiltzarrean orduko Hizkuntza Politikarako sailburuorde Patxi Baztarrikak. «Iraultza txiki bat» agindu zuen, azterketak, ebaluazioa eta beste zenbait gai -langile publikoentzat finkatutako hizkuntza eskakizunak barne-, egoera soziolingustikoari egokituko zitzaizkiola aurreratuz, gaitasun komunikatiboak lehenetsiz euskararen erabilera areagotzeko.

Aldaketak, esan zen orduan, 2017an hasiko ziren garatzen. Neurrien artean aipatu zen euskararen irakaskuntzan diharduten erakunde guztien ebaluazio sistema bateratzen eta homologatzen joatea; ebaluazio jarraia ezartzea; neurtzen diren oinarrizko lau gaitasunen artean (idazmena, irakurmena, entzumena eta mintzamena) ahozko trebetasunak hobestea eta beste...

Deitu diren aurreneko azterketak EGAri dagozkionak direnez, horietan jaso beharko lirateke aurreneko aldaketak. HABEk, esaterako, ez du oraindik egin aurtengo azterketei dagokien deialdia. Hala ere, 2017. urteko EGA azterketa-eredua finkatzen duen 2016ko azaroaren 21ko aginduaren artean eta 2016. urtekoa finkatu zuen 2015eko azaroaren 26ekoaren artekoan ez dago diferentzia handirik. Hiru aurki daitezke, nagusia eta gehien nabarmendu dena proba idatzia egiteko ematen den denborari dagokiona. Aurten denbora gehiago izango dituzte azterketariek. Lehenengo atala egiteko 65 minutu izango dituzte, aurreko urtean bezala, baina 10 minutu gehiago emango dizkiete bigarren ataleko hiru atazak (idazlan luzea, idazlan laburra eta esaldiak berridaztea) burutzeko: 130 minutu. Guztira, beraz, proba idatziak 3 ordu eta 15 minutu iraungo du, aurreko urtean baino 10 minutu gehiago. EGA gainditzeko, lehen bezala, azterketaren hiru faseak gainditu beharko dira (atariko proba, proba idatzia eta ahozko proba). Gai edo Ez Gai, hori izango da azken emaitza, eta deialdi bateko proba baten puntuak ez dira gordeko hurrengo deialdi baterako.

Aldatu da, halaber, erreklamazioak egiteko dagoen epea. Aurreko deialdietan bost eguneko epea zeukaten konforme ez zeuden azterketariek erreklamazioa egiteko. Aurtengo lehen deialdian hiru egunera jaitsi da epea. Euskaltzaindiaren arau-erabakiak eguneratzea ere komeni da. Hain zuzen ere, Akademiak 2015era arte eman dituenak hartuko dira kontuan aurten, aurreko deialdian 2014ra artekoak hartzen zirelarik kontuan.

Temas

Recibe nuestras newsletters en tu email

Apúntate