Diario Vasco

Jokin Azkue izendatu dute HABEko zuzendari nagusi

Jokin Azkue Euskara Sustatzeko zuzendaria izan da azken legealdian.
Jokin Azkue Euskara Sustatzeko zuzendaria izan da azken legealdian. / IÑIGO ROYO
  • Orain arte ardura hori izan duen Joseba Erkizia ordezkatuko du, eta Azkuek utzi duen Euskara Sustatzeko zuzendaritza Estibalitz Alkortak hartuko du

Miren Dobaranen ardurapeko Hizkuntza Politikarako sailburuordetza ari da egitura berritzen, Eusko Jaurlaritzako Kultura eta Hizkuntza Politikako Sailak ohar baten bidez jakinarazi baitu Jokin Azkue izendatu dutela HABEko zuzendari nagusi, orain arte ardura hori izan duen Joseba Erkiziaren ordez. Era berean, Estibalitz Alkorta izango da aurrerantzean Euskara Sustatzeko zuzendari. Gobernu Kontseiluak astearte honetako saioan onartu ditu izendapen berri hauek.

Helduen euskalduntzearen eta alfabetatzearen gidaritza izango da Azkueren ardura nagusia. Oharrak zehazten duenez, «euskara ikasteko bailabide didaktikoak lantzea edota udal euskaltegien zein gizarte ekimeneko euskaltegi homologatuen jarduera finantzatzen laguntzea eta sustatzea izango dira, besteak beste, bere eginkizunak». Psikologian lizentziatua da Azkue eta eskarmentua badauka erakunde autonomo honetan, 1996tik 2005era HABEko zuzendaria izan baitzen.

Horrez gain, Hizkuntza Normalizatzeko teknikaria izan da Eusko Jaurlaritzan bi etapa ezberdinetan (1986-1994 eta 2011-2013) eta Herri Administrazioetan Hizkuntza Normalizatzeko Zuzendari gisara ere jarduna da bi garai ezberdinetan (1994-1996 eta 2005-2008). EAJko zinegotzia Tolosako Udalean, azken legealdian Euskara Sustatzeko Zuzendaria izan da. Kargu hau da, hain zuzen, Estibalitz Alkortak orain hartu duena.

Estibalitz Alkorta Lasarte-Oriako ingeniari industriala da eta enpresara aplikatutako Kalitate Kudeaketan du masterra. Kalitatearen kudeaketan auditorea ere bada, baita lan arriskuen prebentziorako teknikaria. Oharrak zehazten duenez, «hiru hizkuntza menperatzen ditu (euskara, gaztelania eta ingelesa), eta sektore pribatuan zein publikoan aritu da». Batetik, kalitateko arduraduna eta gerentea izan da fabrikazio elektronikoko sektoreko enpresa batean. Bestetik, Gipuzkoako Foru Aldundiko Euskara Zuzendaria izan zen 2007tik 2011ra eta Lasarte-Oriako Udalean Ogasuneko batzorde-burua zein EAJko bozeramailea izan da. 2008tik Euskararen Aholku Batzordeko kidea da.

Temas

Recibe nuestras newsletters en tu email

Apúntate