Diario Vasco

'Pauso bat aurrera' emateko garaia

Iaz Elgoibarren egin zuten jaiaren irudia.
Iaz Elgoibarren egin zuten jaiaren irudia. / AITOR
  • Hori aldarrikatuko du Euskararen Egunean du 85 elkarte biltzen dituen Euskaltzaleen Topaguneak 'Euskarak 365 egun' ekimenaren bidez

Euskararen Nazioarteko Egunaren bueltan antolatzen diren ekitaldi asko bilduz, Euskaltzaleen Topaguneak 'Euskarak 365 egun' ekimena jarri du martxan aurten ere. Ohar baten bidez azaldu duenez, «abenduaren 3an euskaltzaleon jai eta aldarrikapen eguna izatea du xede ekimenak eta aurten ere hainbat herri eta eskualdetan izango du presentzia kanpainak».

'Pauso bat aurrera' emateko garaia dela aldarrikatuko da aurtengo bilkuretan. «Euskararen normalizazioan urrats berriak eman beharra azpimarratu eta herritarrak, elkarteak, erakundeak eta gizarte eragile nahiz entitate pribatuak deituko dira pauso horiek eman ditzaten».

Herriz herri euskarak pauso bat aurrera eman dezan erronkak proposatzeko deia egin die Topaguneak euskaltzaleei. Horrela, «hurrengo urteetan erronkak pauso bihur daitezen mapa osatzen joatea da helburua». Izan ere, «euskarak aurrerapausoak emateko egunero hainbat konpromiso hartzen dira Euskal Herrian zehar eta horiek ikustaraztea eta zabaltzea da euskaltzaleen mugimenduaren nahia. Horregatik, abenduaren 3an eta aurreko egunetan sare sozialen bidez zabalduko diren erronka horiek 365egun.eus webgunean bilduko dira, mapa batean kokatuta».

Azken hilabeteetan hainbat herritan (Donostiako Egia auzoan, Agurainen, Hernanin, Arrigorriagan, Lasarte-Orian,…) euskaltzaleek egindako ahalduntze ariketak eredu bihurtzen ari direla azpimarratu du Topaguneak eta hurrengo hilabete zein urteetan, herri eta arlo ezberdinetara zabaltzeko deia egin die euskaltzale, erakunde eta gizarte eragileei. Izan ere, euskaltzale antolatuen ekimenez sortu diren ariketa hauen bidetik eragite garai berri bat zabaltzen ari da.

Urtero modura, ekimenaren bidez, «euskaltzaleen mugimenduak urte osoan egiten duen lanaren aldarrikapena egin nahi izan da, eta baita egunero-egunero euskaraz aritzeko guneak eta aukerak sortzen diharduten euskaltzaleei aitorpena egin».

Euskal Herriko hainbat herritan egingo diren kale-ekimenetan mezu bateratu bat irakurriko da aurten ere, 'pauso bat aurrera' izenburua duen mezua. Egingo diren bilkura horietako batzuen berri 365egun.eus webguneane eta ohar honi erantsitako zerrendan aurkituko duzue.

Ekimenaren koordinazio lana egiten duen Euskaltzaleen Topagunea 1997an sortu zen, eta Araba, Bizkaia, Gipuzkoa eta Nafarroako 85 Euskaltzaleen Elkartek osatzen dute.

Temas

Recibe nuestras newsletters en tu email

Apúntate