Diario Vasco

Klusterren IV. Nazioarteko Biltzarra egingo da Donostian

Miramar jauregian izango da
Miramar jauregian izango da
  • Enpresen arteko Lankidetzaren III. Saria ere banatuko da

Klusterren IV. Nazioarteko Biltzarra izango da Donostian asteartean, azaroaren 15ean, egungo testuinguru ekonomikoan beharrezkoa den enpresen arteko lankidetza ereduaz gogoeta egiteko. Gainera, Gipuzkoako Foru Aldundiak ematen duen Enpresen arteko Lankidetzaren III. Saria banatuko da, Gaia klusterrak jakinarazi duenez.

Topaketa Miramar jauregian izango da, eta enpresa elkarte berritzaileen arduradunak eta erakundeen ordezkaritza zabala bilduko da, enpresa lankidetzaren erronkei buruz gogoeta egiteko. "Gaur egungo testuinguruan sektore guztietan gero eta nabarmenagoa da aliantza estrategien beharra eta horixe da ekimen honen zio nagusia", azaldu du.

Aurtengo biltzarraren helburua da praktika onak eta gogoeta partekatzea gure inguruko ekonomia guztiek komunean duten erronka nagusiaren inguruan: nola garatu estrategia berritzaileak Espezializazio Adimenduna (RIS3) delakoaren esparruan, Europar Batasunak bultzatuta.

"Testuinguru honetan finkatu ahal izateko, ahalegin publiko eta pribatuak nahitaez lerrokatu egin behar dira, eta beraz, enpresen arteko lankidetza indartu egin behar da. Eragile publiko eta pribatuen arteko topaketarekin, eta egitarauan aurreikusitako gaikako eztabaidekin, proposamen zehatzak eginez ekarpena egin nahi da, honezkero abian diren praktika onak ezagutuz eta aintzat hartuz", azaldu du antolakuntzak.

Kluster erakundeen ordezkaritza zabala izango da Donostian, eta beraiekin, era guztietako erakundeen ordezkariek ere parte hartuko dute. Horrez gain, lan jarduna ere antolatu da inter-lankidetzako ekimenetan parte hartzen ari diren enpresekin, "helburutzat" hartu diren merkatuetan negozio aukerak lantzeko: osasuna eta etxeko asistentzia, talentua eta teknologia digitala, industria prozesuen automatizazioa, konektatutako produktu eta zerbitzu adimendunak, eta industria prozesuak laguntzeko zerbitzuak.

Temas

Recibe nuestras newsletters en tu email

Apúntate