Diario Vasco

Ikastolen Elkarteak ez du bat egiten etziko greba deialdiarekin

  • Lomceren aurkako protestak «ez dio hezkuntza sistema propioaren eraikuntzari ekarpenik egiten, eta Estatuko hezkuntzaren logikari erantzuten dio», azaldu du

Ikastolen Elkarteak azaldu du ohar baten bidez ez duela bat egiten asteazken honetarako, hilak 26, hainbat eragilek deitu duten grebarekin. Hain zuzen ere, Euskadin ELA eta Steilas sindikatuek eta EHIGE eskola publikoko gurasoen elkarteak biltzen dituen federazioak ordubeteko lanuztea deitu dute Lomceren eta, zehazki, lege horrek finkatzen dituen errebalidak egitea ahalbidetzen duten dekretuak nahiz murrizketak salatzeko. CC OO eta UGT sindikatuek, euren aldetik, borroka eguna deitu dute, Lomceren eta Heziberriren kontrako protesta gisa.

Ikastolen Elkartearen ustez «deialdi hau espainiar Estatuko hezkuntza logikan kokatzen da, zehazki indar posizio bat eskuratu nahian, zenbait hezkuntza eragileren eta alderdiren partetik, Madrilen negoziatzen ari den eskola paktuari dagokionean, arlo instituzionalean ezjakintasuna nagusia den momentu hauetan». Hain zuzen ere, «greba deialdiak ez dio Hezkuntza sistema propioaren eraikuntzari ekarpenik egiten, eta Estatuko hezkuntzaren logikari erantzuten dio». Horregatik ez dute bat egiten Sindicato de Estudiantesek abiatu, CEAPAk babestu eta «azken egun hauetan, zenbait euskal hezkuntza eragileren» bultzada izan duen grebarekin.

«Paktu horrek, Madrildik etorri diren hezkuntza arloko gainontzeko lege organikoek bezala, ez dio ezer onik ekarriko gure herriari», azaldu du Ikastolen Elkarteak prentsa ohar baten bitartez, aldarrikatuz «Madrilek ezartzen digun markoa gainditu eta Euskal herrian behar eta nahi dugun Hezkuntza Sistema Propioa eraiki behar» dela.

«Lomceren aurka egon gara, gaude eta egongo gara. Zentralista, atzerakoi eta doktrinatzaile izateaz gainera, pedagogikoki ere, duela ehun urte geunden puntura garamatza. Gure eredu pedagogikotik kontrako muturrean dago», gogoratu dute ikastolek, baina uste dute beste bat dela lehentasuna: «Gaur egun gure hezkuntza sistemaren oinarrizko edukiaren eztabaidari heldu behar diogu, eta eztabaida soziala bultzatu. Eta eztabaida horretan erantzukizunez jokatu, erretratatuta geratuko baikara hartzen ditugun erabakietan, erakusten dugun jarreran, elkarlanerako eta adostasunerako dugun borondatean. Gai oso garrantzitsuak dira, eta, zorionez, gizartean ere eztabaidagai dira. Euskal jendartea Hezkuntzari begira jarria dago; arrazoi bat gehiago, sendoa gainera, guztiok dagokigun erantzukizunarekin, elkarlanarekin eta adostasunarekin jokatzeko».

Temas

Recibe nuestras newsletters en tu email

Apúntate