Diario Vasco

Euskarazko Komunikazioaren Nazioarteko II. Biltzarra

  • Duela 12 urte egin zen Euskal Kazetaritzaren Nazioarteko I. Kongresuari jarraibidea eman nahi zaio ostegun honetan hasten den biltzarrarekin

Euskarazko Komunikazioaren esparruan diharduten eragile eta protagonista ugari bilduko da hiru egunez, urriaren 20an eta 21ean egun osoz eta 22an goizez, Euskarazko Komunikazioaren Nazioarteko II. Biltzarrean. Lehen bi egunetan, Leioan UPV/EHUko Gizarte eta Komunikazio Zientzien Fakultatean bilduko dira hizlariak, entzuleak eta parte hartzaileak oro har. Biltzarraren azken eguna goizeko saioetara mugatuko da, eta Bilbon egingo dira, UPV/EHUko Bizkaia Aretoan.

Biltzarrak UPV/EHUko Gizarte eta Komunikazio Zientzien Fakultateak, UEUko Komunikazio Sailak, Hekimenek, Berria Taldeak eta EITBk antolatu dute, eta duela 12 urte egin zen Euskal Kazetaritzaren Nazioarteko I. Kongresuari jarraibidea eman nahi dio. Hala ere, dezente atzerago jotzen duten antolatzaileek biltzarraren xedea argitzerakoan: «EITB sortu zenetik 34 urte pasatu dira; Euskaldunon Egunkaria kaleratu zela, 26 urte dira; hedabide lokalak zabaltzen hasi zirenetik ere beste horrenbeste... Euskarazko Kazetaritzaren I Nazioarteko Kongresua egin zela, berriz, hamabi urte igaro dira jada. Jardunaldi haien abiapuntua euskarazko hedabideen gaineko halako diagnostiko-aitortza bat izan zen, eta, besteak beste, honako puntuak zehaztu ziren: euskal komunikazio esparrua txikia izanik ere izan bazen, eta gero eta nabarmenagoa hedabideen munduan; alabaina agerian zuen zenbait ahulezia ere: egoera soziolinguistikoa, merkatuaren txikitasuna, lan baldintza makurrak edo diru-laguntza politika definitu gabeak. Diagnostiko horrekin batera ondorioetan honako baieztapenak eta aldarrikapenak jasotzen ziren: erakunde publikoen laguntza eta lankidetzaren beharra; gutxieneko estandarretan, kalitatean egin beharreko apustua; euskarazko publizitate sareak osatu beharra, non Administrazioak berebiziko ardura izan beharko lukeen; albiste iturriak landu beharra; espezializazioa lantzea; teknologia berrietara egokitze bidean multimedia ereduak garatzen joatea, eta bere burua ezagutzeko egitura iraunkorrak jartzea martxan. Hori guztia landu eta finkatu beharrak zekartzan buruhausteez gain, digitalizazioak zekarren erronkari nola erantzungo zitzaion ez zen ziurra».

Besteak beste, euskarazko hedabideetan diharduten aspaldiko profesionalen eta hasi berriagoak direnen jarduerak ezagutzeko parada izango da biltzarrean, ohiko kazetaritzaren bideetan dabiltzanenak eta bide berriak urratu eta lantzen diharduten beste komunikatzaile batzuenak, eduki eta formatu berriak probatzen dabiltzanenak.

Temas

Recibe nuestras newsletters en tu email

Apúntate