Diario Vasco

«Nafarroa Oinez hau beharrezkoa da guretzat, ezinbestekoa»

'Hartu, tenka, tira' goiburua oso presente izan dute aurkezpenean.
'Hartu, tenka, tira' goiburua oso presente izan dute aurkezpenean. / N.=-
  • Lodosa eta Vianako ikastolek dena prest dute bigarren herri horretan datorren igandean, urriak 16, egingo den euskararen festarako

Datorren igandean, urriak 16, Vianan egingo den Nafarroa Oinez ikastolen eta euskararen festa «historikoa» izatea nahi dute eguna antolatzen hilabeteak daramatzaten Erentzun eta Ibaialde ikastolek. Eta horretarako gizartearen laguntza eskatu dute astelehen honetan Iruñean, Nafarroako Ikastolen Elkartearen egoitzan, egin duten aurkezpenean. Josu Reparaz, NIEko Zuzendaria; Iñigo Telleria, Ibaialde Ikastolako Zuzendaria; Maite Otero, Erentzun Ikastolako zuzendaria; Miren Balmaseda, Ekintzen Batzordeko arduraduna eta Unai Arellano Txikiak Handi proiektuaren arduraduna aritu dira edizio honen inguruko zehaztapenak ematen.

Duela urtebete hartu zuten Lodosa eta Vianako Ikastolek, «ilusioz eta urduritasunez», Nafarroa Oinez 2016 antolatzeko lekukoa. Orduz geroztik lanean aritu dira bi ikastola txikiok, herritar askoren laguntzaz, aurkezpenean azaldu duten bezala «Oinez erronka honi eusteko gai bagarela erakutsiz».

Antolatzaileek urte guztian zehar aipatu dute aurtengo Nafarroa Oinez historikoa dela: «Bi ikastolek elkarrekin antolatu duten lehen Nafarroa Oinez delako, bi ikastola txikik indarrak batu eta proiektu komun bat bultzatu dutelako: Nafarroa Oinez, euskara eta ikastola. Eta buruan ideia garbi bat: gure inguruan kalitatezko hezkuntza euskaraz eskaintzea».

Behar-beharrezkoa

Iñigo Telleriak azpimarratu duenez, «gure Oinez historikoa da, eta beharrezkoa bestalde. Guretzat behar-beharrezkoa den Oinez baten aurrean aurkitzen gara, ezinbestekoa, gure proiektua sendotzeko klabea dena eta hori transmititu nahi dugu gizarteari. Soka izan da gure ikurra. Bide guzti honetan gure herrietako norbanako eta erakunde desberdinak sokara gehitu ditugu, euskara denona eta guztion ardura delako eta denon artean lotzen gaituen euskararen soka indartu behar dugulako».

Lodosa eta Vianako gurasoek 18 hilabete luzez lan egin dute eta, azpimarratu dutenez, orain gizarte osoaren laguntza behar dute eguna benetan historikoa izan dadin. «Zuek zarete orain protagonistak, zuek egingo duzue historikoa gure Nafarroa Oinez egunean, zuen presentziarekin», gehitu du Lodosako zuzendariak Eta honela amaitu du: «Bete dezagun Viana leporaino eta apur ditzagun guztien artean euskarak Ebro ondoan izan dituen mugak Igande honetan, irailak 16, batu gaitezen eta lagun iezaguzue euskararen sokatik inoiz baino indartsuago TIRA egiten».

Zirkuitua Vianan barrena izango da. Hiri ibilbidea izango da, 3.6 kilometro dituena, eta lau gunetan banatuta. Asfaltatutako zirkuitua da, Vianako gune historikoa inguratuko du eta zenbait tokitan hiri honen monumentaltasuna gozatzeko aukera emango du. Ibilbide erraza, bestalde, edozeinentzat egokia.

Guneek, zenbakiaz gain, izena ere badute, eta aurten jaia antolatzen duten bi ikastolen elkarlana nabarmendu nahi izan dute horiek jartzeko orduan. Honela, 1. gunea Erentzun izendatu da (Vianako Ikastola), 2. Endregoto (Vianako sorgina), 3. gunea Pipergontzi (Nafarroa Oinez 2016ko bideokliperako sortu genuen pertsonaia, Lodosako piperrez egindako erraldoia) eta azkenik, 4. gunea Ibaialde izango da (Lodosako Ikastola).

Festaren inaugurazio ekitaldi ofiziala 10:00etan burutuko da Erentzun Ikastolan. Zirkuituan bertan ez baina gertu dagoen ikastolan egingo da halaber 12:00etan Txikiak Handi manifestuaren sinaketa, irakasle eta ikasle ohien omenaldia eta Euskadiko Idazle Elkartearena egingo dira.

Temas

Recibe nuestras newsletters en tu email

Apúntate