Diario Vasco

Kimikako eta Fisikako Nobelekin solas egiteko aukera

'Passion for Knowledge'-en mahai-ingura.
'Passion for Knowledge'-en mahai-ingura. / M.FRAILE
  • Puntako zientzialarien eta DBHko 350 irakasle eta ikasleren arteko topaketa egingo da asteazken honetan, irailak 28, Bilbon

'Passion for Knowledge 2016' jaialdiaren jardueren artean top@DIPC - Zientziarekin solasean! topaketak izango dira asteazkenean, irailaren 28an, Euskal Herriko Unibertsitateko (EHU) Bizkaia Aretoan, Bilbon, 10:00etatik aurrera. Horrela, Derrigorrezko Bigarren Hezkuntzako (DBH) 350 ikasle eta irakaslek maila goreneko ikertzaileak -tartean bi Nobel saridun- elkarrizketatzeko aukera izango dute.

Aurreko urteetan bezala, topaketa honekin zientzia eta ikerketarako bokazioak sustatu nahi ditu Donostia International Physics Center (DIPC) zentroak. Gainera, Telefónica konpainiak saria emango die «hiru galdera berritzaile, burutsu, interesgarri, argi, irudimentsu, txundigarri edo originaleei», DIPCek jakinarazi duenez.

Harrera Cristina Uriarte Eusko Jaurlaritzako Hezkuntza, Hizkuntza Politika eta Kultura sailburuak eta Iñaki Goirizelaia EHUko errektoreak egingo dute, eta DBHko ikasleak eta irakasleak Dame Jocelyn Bell Burnell, Claude Cohen-Tannoudji eta Martin Karplus zientzialariekin elkartuko dira. Pedro Miguel Etxenike EHUko katedradun eta DIPCeko presidenteak moderatzaile lanak egingo ditu.

Modu honetan, ikasleek aukera izango dute giro lasai eta atseginean Claude Cohen-Tannoudji Fisikako Nobel saridunarekin, Martin Karplus Kimikako Nobel saridunarekin eta Dame Jocelyn Bell Burnell Oxfordeko Unibertsitateko astrofisikariarekin solasteko eta beren zalantzak eta galderak zuzenean planteatzeko.

Gonbidatutako ikertzaileek zientziarekiko eta ikerketarekiko grinari buruz hitz egingo dute eta beren bizipenei eta ibilbide profesionalean metatutako esperientzia guztiei buruzko galderak erantzungo dizkiete ikasleei. Topaketa hauen helburu nagusia da, hain zuzen, Euskal Herriko ikasleen artean ikasketa zientifiko eta teknologikoekiko bokazioa bultzatzea; betiere, ezagutzarekiko pasioak ikasle gazteak goitik behera busti ditzan.

Temas