Diario Vasco

Turismoaren Munduko I. Eguna

'Garapenerako Turismo Jasangarriaren Nazioarteko Urtea' izango da astearteko jardunaldiaren izenburua.
'Garapenerako Turismo Jasangarriaren Nazioarteko Urtea' izango da astearteko jardunaldiaren izenburua.
  • Deustuko Unibertsitateak Turismoaren Munduko I. Eguna ospatuko du Donostiako campusean datorren asteartean, irailaren 27an

Deustuko Unibertsitateko Donostiako campusak Turismoaren Munduko I. Eguna ospatuko du datorren asteartean, irailaren 27an, 'Garapenerako Turismo Jasangarriaren Nazioarteko Urtea' izenburuarekin. Jardunaldia Gizarte eta Giza Zientzien Fakultateak eta Gipuzkoako Foru Aldundiak antolatu dute, foru erakundeak Explore San Sebastian Region markaren bidez.

Maite Cruzado Gipuzkoako Aldundiko Kultura, Turismo, Gazteria eta Kirol Saileko Turismo zuzendariak parte hartuko du ekitaldian, eta Cristian Palazzi Bartzelonako HTSIko Turismo Arduratsuko Behatokiko proiektuen buruak 'Del turismo sostenible al turismo responsable. Apuntes para una ética del turismo en el siglo XXI' hitzaldia emango du.

Ondoren, mahai inguru bat izango da, turismo jasangarriaren inguruko Gipuzkoako hainbat ekimen aurkezteko. Moderatzailea Denis Itxaso Gipuzkoako Diputazioko Kultura, Turismo, Gazteria eta Kiroletako foru diputatua izango da, eta parte hartzaileak, Jon Oliden (Azaldu Marketing-en sortzailea), Oihana San Sebastian (BiziBiziki), Inaxio Muguruza (Irungo Atalaia hotelaren eta jatetxearen jabea) eta Laura Larrion (Hagoos). Ekitaldiaren amaieran, Turismoa guztiontzat! argazki lehiaketaren sariak emango dira.

Ikastaroa

Bestalde, irailaren 28an eta 29an, 'Turismo irisgarria eta desgaitasunen bat eta bestelako beharrak dituzten bezeroen arreta' ikastaroa izango da Deustuko Unibertsitateko Donostiako campusean, Predif desgaitasun fisikoren bat duten pertsonak ordezkatzeko Espainiako plataformak antolatuta, Deustuko Unibertsitateko Gizarte eta Giza Zientzien Fakultatearen laguntzarekin.

Ikastaroaren helburua da turismo arloko establezimenduetan eta norakoetan desgaitasunen bat duten pertsonei eskaintzen zaien arreta hobetzea. Gainera, turismoko establezimenduen irisgarritasunaren autodiagnostikoa egiteko, irisgarritasun hori kudeatzeko eta hobetzeko ekintzak abian jartzeko tresnak proposatuko dira.

Ikastaroan, kontzeptuak definituko dira, desgaitasun motak azaldu, turismo irisgarriaren merkatu analisia egin, behar bereziak dituzten bezeroei arreta emateko irizpideak zehaztu. Gainera, ikasleak ikastaroa eskaintzen deneko eraikinean ibili ahal izango dira gurpildun aulkietan, begiak estalita eta bastoiekin, desgaitasunen bat duten pertsonak nola sentitzen diren ikusi ahal izateko.

Bestalde, desgaitasunen bat duten pertsonen tokiko elkarteetako kideek aurrez aurre azalduko dute zein diren beren beharrak turismoa egiteko orduan. Bizi izan dituzten jardunbide onak eta txarrak ere aipatuko dituzte. Ikastaroari amaiera emateko, mahai ingurua izango da. Bertan, tokiko turismo sektoreko profesionalek turismo irisgarria lortzeko ekimenak emango dituzte ezagutzera.

Temas