Diario Vasco

Parkean ere euskaraz

Haurrak parkean euskaraz ibiltzea da 'Parketarrak'en helburua.
Haurrak parkean euskaraz ibiltzea da 'Parketarrak'en helburua. / ARIZMENDI
  • 'Parketarrak' egitasmoa Donostiako hamaika auzora iritsiko da astelehenetik aurrera, haurrek jolasean euskara erabili dezaten

Donostiako Udaleko Euskara Zerbitzuak eta auzoetan antolaturiko euskara batzordeek 'Parketarrak' egitasmoa antolatu dute hiriko hamaika auzotan udazkenean. Lehen saioak Altzan, Aieten eta Amara Berrin izango dira, datorren astelehenean, irailaren 26an. Ekimenaren helburu nagusia haurrak kalean eta parkeetan jolasean ari direnean euskara erabiltzea da.

Urtxintxa eskolak aurrera eramango duen egitasmo hau bi programatan banatuta dago: bata, 'Zabu-zibu', 3-5 urte bitarteko haurrentzat eta beraien familientzat antolaturikoa eta, bestea, 'Txirrintxon', 6-9 urte bitarteko haurrentzat. Horrela, egitasmoaren lehen txandak datorren astelehenean hasi eta urriaren 28ra bitartean iraungo du eta Donostiako plaza eta parke anitzetan jolasak antolatuko dira. Egitasmoa doan eskainiko da.

Antolatzaileek adierazi dutenez, egitasmoak oso harrera ona izan zuen joan den urtean. 'Zabu-Zibu' programan 1.200 bat haurrek eta 225 gurasok parte hartu zuten, eta 'Txirrintxon' programan, berriz, 974 umek. Horrela, egitasmoaren arrakasta ikusita, aurten ere 11 auzotan egingo da: Altza, Bidebieta, Intxaurrondo, Martutene, Loiolako Erriberak, Amara Berri, Añorga, Parte Zaharra, Egia, Aiete eta Igeldo.

Donostiako hamaika auzo horietan euskara batzordeak sortu dira eta plangintza bat aurrera eramaten ari dira euskara sustatzeko auzoan bertan. Plangintza horien helburuetako bat euskara aisialdi eremuetan erabiltzea da, eta horretarako Parketarrak ekimena «oso eraginkorra» dela ikusi dute Euskara Zerbitzuak eta auzoetako euskara batzordeek.

Horrela, urte osoan zehar, hiru txanda edo ekitalditan banatuta, aipatutako hamaika auzoetan egiten ari da ekimena: martxoan, maiatzean eta iraila-urrian. Txanda bakoitzak lau saio izango ditu (astero bat), 3-5 urte bitarteko haurrentzat bata eta 6-9 urtekoentzat bestea.

Parkean euskaraz

Miren Azkarate Donostiako Udaleko 2016 Hiriburutzako, Kulturako, Euskarako eta Hezkuntzako zinegotzi ordezkariaren hitzetan, ekimenaren helburu nagusia familiek eta haurrek parkean euskaraz egitea da.

«Jolasak lagungarriak dira horretarako, jolasen bitartez hizkuntza lantzen baita batetik eta euskara kalean erabiltzeko ohitura areagotzen baita bestetik. Hizkuntzaren erabilera ludikoa lantzen da, hau da, euskaraz jolas egiten ondo pasako dute eta lagunarteko harremanak euskaraz eraikitzeko urrats garrantzitsua izango da», azaldu du.

Azkarateren iritziz, giltzarria da haurrek ikustea euskara esparru guztietan erabili dezaketela eta ez dutela nahitaez gaztelerara jo beharrik jolasteko, behar dituzten esamoldeak edo esaerak aurkitzeko.

«Haurrek eta gazteek, sarritan, eskolan edota familian bakarrik erabiltzen dute euskara. Kalean, berriz, aisialdian, gauzak aldatu egiten dira eta lagunartean komunikatzeko garaian, euskara askoz ere gutxiago erabiltzen dute eta sarritan nahikoa txikitatik hasten da prozesu hori. Joera hori aldatzeko Parketarrak ekimena lagungarria da oso», adierazi du.