Diario Vasco

Pilotaria izan nahi duen emakumea

Emma Johnson eta Irati Santiago Villabonako pilotalekuan.
Emma Johnson eta Irati Santiago Villabonako pilotalekuan. / M.T
  • Irati Santigoren lehenengo film laburra Villabonan grabatu da eta pilotan modu profesionalean jokatu nahi duen neska bati buruz datza

Villabonako pilotalekua errodaje plato bat bihurtu da bost egunez. Irati Santiago Mujikak bere lehenengo film laburra grabatu du bere herrian. Betidanik egon da pilota munduarekin harremanetan, izan ere, «nire mutila pilotaria da eta nire osaba Imanol Mujika erremontista da (1988 eta 1991n buruz buruko txapelduna)».

Gauzak horrela, Iratik argi eduki zuen eta Chicagoko Columbian College unibertsitatean ikasten ari den masterrerako tesia «pilotan jokatzen duen neska bati buruz egitea pentsatu nuen. Hau da, pilotari profesionala izan nahi duen emakumea. Normalean frontoien mundua gizonezkoen mundua da, baina Arbernek (bere film laburreko pertsonaia nagusiak) bere ametsak lortzeko asko borrokatuko du». Emma Johnson zuzendariak, eta Iratiren lagunak, berehala esan zion berarekin lan egingo zuela.

Protagonistak bezala, filmak ere 'Aberne' izena du. Pilotan jokatu nahi duen gazteari Janire San Sebastiánek ematen dio bizitza. Zizurkilgo neska antzerki lanetan sartuta dago eta pilotan jokatzen du, beraz «Janire zen Aberneren papera egiteko pertsonarik egokiena. Ezusteko ikaragarria izan zen berarekin topatzea. Ezin dut aktore hobeagorik pentsatu paper hau egiteko», dio Iratik.

Amaren babesa

Filmean Abernek oso argi dauka etorkizunean pilotari profesionala izan nahi duela, baina bere amaren ustetan hori ez da ideiarik hoberena. Maitek (amak) okindegi bat du eta bere alboan nahi luke lanean. Halere, Erramun eta Julen mutilak konfiantza handia dute haien lagunarengan.

Janirek interpretatzen du paper nagusia, baina Agurtzane Intxaurraga (ama), Feliz Arkarazo (Erramun) eta Iñaki Beraetxe (Julen) aktore ospetsuak ere badaude pelikulan.

Irati jadanik Chicagon dago film laburra produzitzen. Bertan aurkeztu ondoren Villabonan erakutsiko du eta «'Aberne' film luzea bilakatzea gustatuko litzaidake». Nork daki zer gertatuko den Irati Aberneren moduan borrokatzen badu bere ametsak lortzeko.

Temas