Diario Vasco

Kilometro guztiak erakusketa berean

Erakusketa jadanik ikusgai dago Bergaran.
Erakusketa jadanik ikusgai dago Bergaran.
  • Zabalik da 'Kilometroak bidea' esposizioa Bergarako Aroztegi aretoan; bertan jaso dira, panelen bitartez, 1977tik 2015era bitarte egin diren Kilometroak jaiaren 39 edizioetako dokumentu grafikoak

Zabalik da 'Kilometroak bidea' izeneko erakusketa Bergarako Aroztegi aretoan. Bertan jaso dira, panelen bitartez, 1977tik 2015era bitarte egin diren Kilometroak jaiaren 39 edizioetako argazki, irudi, lelo edota egunkarietan agertutako albisteak. Aurten, urriaren 2an, berrogeigarrenez, Bergaran ospatuko den Kilometroak jaiaren aurreko edizioen, eta gizartearen beraren, bilakaera ikus daiteke erakusketan.

Gipuzkoako Ikastolen Elkarteak egiten diharduen 'Kilometroak bidea' hausnarketa prozesuaren testuinguruan kokatzen da erakusketa. «Azkenaldian bagabiltza Kilometroak jaiaren ereduaren gaineko hausnarketan eta erakusketa hau horren parte da. Izan ere, Kilometroak jaiaren protagonista izan direnen testigantzak eta esperientziak jasotzen ari gara-eta, prozesua aberasteko. 2020 urtera begira gabiltza lanean, perspektiba hartuz, atzera begirakoa eginez, Kilometroak jaia berrasmatzen lagunduko digulakoan», adierazi du Gipuzkoako Ikastolen Elkarteko Igor Elortzak.

Erakusketa irekia eta ibiltaria izango da. Eta, hala, hurrengo urtean Oñatira eroango dute, «Bergarako aurtengo edizioko argazkiak-eta gehituz», esan du Nekane Artola Kilometroak Kultur Elkarteko lehendakariak.

Zentzu honetan, Mikel Egibarrek, Kilometroak 2016ko koordinatzaileak esan du «artxibo historikoa berreskuratzeko ahaleginean», erakutsi nahi izan dutela orain arte batutakoa, baina «kapital historikoa berreskuratzen» jarraituko dutela, «prozesu irekia» delako.

Erakusketa astelehentik ostiralera 18:00etatik 20:00etara irekita egongo da. Larunbatetan, 12:00etatik 14:00etara eta 18:00etatik 20:00etara eta igandeetan, 12:00etatik 14:00etara.

Ekarpenak webgunean

'Kilometroak bidea' prozesuaren bultzagileek adierazi dute webgunea ere irekiko dutela eta webguneak irekia izan nahi duela, «jendearen ekarpenak jasotzeko eta eztabaida foro izan dadin». Horretaz gain, Kilometroak jai ezberdinen argazkiak, irudiak eta bestelakoak ere jasoko.