Diario Vasco

Irurtzun-Arakilgo IV. bertako ganadu azoka igande honetan

Arakil bailararen hiriburuan egingo da IV. Azoka.
Arakil bailararen hiriburuan egingo da IV. Azoka. / J. RAMOS
  • «Azokaren eguneratzea salmenta zuzenaren bidez egiteko proposamena indartuz» doala diote antolatzaileek

Arakil bailararen hiriburuan egingo da IV. Azoka igande honeta. Irurtzun eta Arakilgo udalek, Sakanako Garapen Agentziak, bertako arrazen sustapenerako elkarteak, Arbaso Euskal Herriko artisauen elkarteak, Belardi Sakanako ekoizleen ekimena eta EHNE-Bizilur ekimena dira III. azokaren antolatzaileak.

Irurtzun, Arakil bailararen eta inguruko herrien gune komertzial nagusia izan da aspalditik. Bere abere azokak, gertuko eta urritiko abeltzain eta komertzianteak erakarri izan ditu urte luzeetan zehar. Lehenik, hilean behin izaten zen azoka, gero hamabostean behin (1792-1921) geroago hamarrean behin (1921-1945) eta azkenik astean behin, asteartero, orain dela 40 urte erabat galdu zen arte. Ardiak, txahalak, zerriak, zaldi-behorrak eta gainontzeko abereak, garaiko nekazal produktuak eta artisau-ogibideak, Irurtzungo kaleetan protagonistak izanen dira berriz, datorren igandean, irailak 18.

Ekimen honekin «Irurtzun eta Arakilgo herriek, salmenta zuzenean eta ekoizleen parte hartzean oinarrituriko ereduan pausoak ematen jarraitu nahi dute. Laugarren edizio honetan, aurrekoetan landutako eredua egonkortu eta indartzen da, orain arteko hiru espazioak mantenduz: Bertako abere arrazen azoka, nekazal merkatu gardena eta artisau azoka», diote antolatzaileek.

Bertako abere arrazen gunean, arraza hauen sustapanerako elkarteek antolaturik, hainbat eta hainbat arraza izango ditugu ikusgai. Aurtengoan, iaz izandako arrakasta dela eta, Eoalak elkartearen eskutik Euskal Arrazako oilo eta antzaren erakusketa izango dugu berriro. Urtetik urtera, azoka bere herri izaera handitzen doa, Irurtzun eta Arakilgo herritarren partehartzea handituz egunean zehar antolatzen diren ekitaldi ezberdinetan.

«Aurtengoan eta berrikuntza bezala, laborantza lanabes tradizionalen erakusketaz gain traktore zaharren erakusketa izango da, sei makina hauei esker iraganera joango gara berriro gure lurrak nola lantzen ziren gogoratuz. Iaz bezala, gazteenek, bertako tradizioei loturiko joku eta jolasak ezagutzeko aukera ere izango dute, horretarako espreski prestaturiko gunean», diote antolatzaileek. Eguneko egitaraua osatuz erakusketak, musika, joaldunak eta pertsonaia mitologikoak, kale animazioa, taloak, etab. izango dira. Igande honetakoa, bertako arrazen, ekoizle elaboratzaileen kalitatezko elikagaien eta artisauen lanare gorazarrea izango da nagusi Irurtzun Arakilen.

Temas