Diario Vasco

'Irrien lagunen' festa

Lehengo urteko Bizipozaren edizioan, pailazoak Tolosan.
Lehengo urteko Bizipozaren edizioan, pailazoak Tolosan. / YOUTUBE
  • Datorren irailaren 25ean, igandea, Bizipoza elkarteak antolatutako festa izango da Usurbilen

Datorren irailaren 25ean, igandea, Bizipoza elkartea eta Usurbilgo hainbat eragilek elkarlanean moldatzen ari diren festa ospatuko da. «Elkartasunari aparteko garrantzia eman nahian, gizarte guztiari luzatu nahi diogu gonbidapena», esan dute Bizipozako ordezkariek ostegun honetan egin dute prenstaurrekoan.

Egun osoko jaia izango da irailaren 25ekoa. Goizeko 10:00etan emango zaio hasiera jaiari eta arratsaldeko 18:00ak arte luzatuko da. Tailerrak, puzgarriak, dantzaldia, bazkari herrikoia... hamaika aukera egunaz gozatzeko.

Hiru gunetan banatuko da jaia; batetik zabalik izango den gunea Mikel Laboa plazan kokatuko dena, bertan, tailerrak eta puzgarriak izango dira. Bestea, jai eremu nagusia, oholtza egongo dena, Usurbilgo frontoian izango da eta bazkaria Askatasuna plazan. Bizipozaren Jaiaren eremu nagusira sarrera bidez sartu ahal izango da, bertan izango dira oholtza nagusia, ikuskizunak, elkarteen guneak, piko-piko elkarteekin elkar jolastuz jolasa... Norbanakoen sarrera bost eurokoa izango da eta familia sarrera hamar eurokoa. Egun osoko egitarauaz gozatzeko aukera izango da, Pirritx, Porrotx eta Marimototsen ikuskizuna barne. Urtero bezala, Irrien lagunak klubeko txarteldunek, Irria aldizkariko harpidedunak direnak alegia, doako sarrera izango dute.

Bizipoza Elkartea orain lau urte hasitako Elkartasun Elkartetik sortu da gogoeta estrategiko baten ondorioz, «elkartasunez, elkarte eta norbanakoei laguntza eskeintzetik haratago joateko asmoarekin. Herri bat du helburu, bizipozez arituko den herri bat, auzolanean eta sarean lan egiten irekia eta pertsona ororentzat berdintasunezko harremanak sustatzen lagunduko duen sarea, bizipoza zabaldu nahi duena gizarteko esparru guztietan». Bizipoza Elkartea behar bereziak dituzten haurren eta hauen familien bizi-baldintzak hobetzeko lan egiten duten hainbat kolektiboei proiektu eta egitura egonkor batekin erantzuteko ahalegina da, euren behar afektibo eta materialei aurre egin eta euren errealitatea gizarteratzen lagunduko diena.