Diario Vasco

Euskaltegietan matrikulatzeko epea irekita dago

Ikasleak, euskaltegian euskara ikasten.
Ikasleak, euskaltegian euskara ikasten. / LOBO ALTUNA
  • HABEk 35.000 ikasleko kopurua espero du ikasturte berrian eta %25a igo ditu diru laguntzak

Iraila amaitu arte zabalik da EAEko euskaltegietan izena emateko epea, eta ikasleak jasotzen hasteko prest dira 103 euskaltegi (39 publiko eta 64 pribatu homologatu), eta 1.400 euskara irakasle. Ikasturte berrian (2016ko urritik 2017ko irailera) 35.000 ikasleko kopurua gainditzea da HABEren aurreikuspena.

Eusko Jaurlaritzak, hiru Foru Aldundiak, EAEko hiru hiriburuetako Udalak, Eudel eta Uema izan dira gaur goizean lehen aldiz guztiak batera 2016-2017 ikasturtean euskaltegietan matrikula egiteko deia luzatu dutenak. Hau da, Hakoba hizkuntza politika gaietarako Herri Administrazioen Koordinazio Batzordea osatzen duten erakundeek batuta egin dute gaur gonbitea.

Bestalde, iazko ikasturtean HABEren euskara mailak edo baliokideak gainditu dituzten ikasleek irekia dute dagoeneko diru-laguntzak eskatzeko epea, datorren urriaren 5era arte. Aurten, deialdiak bi maila berri jasotzen ditu, iazko ikasturtean lehen aldiz egiaztatu diren A1 eta A2 mailak, hain zuzen. HABEk 1.250.000 euro bideratu ditu diru-laguntza deialdi honetarako, iazko deialdian baino %25 gehiago.

Goizeko agerraldian, Patxi Baztarrika Hizkuntza Politikako sailburuordeak euskarak hiztunak behar dituela azpimarratu du, eta «euskararentzat era guztietako hiztunak nahi ditugula» gaineratu du, «neurri eta maila desberdinak» kontutan hartuz.

Prentsa agerraldiaren ondoren, ikasturte hasierako ekitaldi akademikoa ospatu da Eureka Zientzia museoan, eta bertan Maite Goñi irakasleak «Teknologiaren aukerak hizkuntzen irakaskuntzan. Heldu erronkari!» izenburuko hitzaldia eskaini du.

Temas