Euskaraz bizitzeak saria du

Bai Euskarari Sarien banaketa ekitaldia egin da ostiral honetan, Donostiako San Telmo Museoan. Urtero bezala, hiru sari eman dira. Bai Euskarari Laguna saria Gaizka Garitano futbol entrenatzaileak jaso du eta Euskal Herria Esnea eta Nekatur izan dira aurtengo ziurtagiridun sarituak. Bai Euskarari Ziurtagiriaren Elkarteko arduradunek gogorarazi duenez, 15 urte egin dira aurten Bai Euskarari Ziurtagiriak sortu zirela. "Urte hauetan Bai Euskararik egindako lana eta eragindakoa aitortzeko eta aintzat hartzeko garaia da", adierazi dute. Horrela, Bai Euskarari Laguna saria Gaizka Garitano futbol entrenatzaileari eman zaio, "azken urteotan, kemenez eta konbikzioz, erakutsitako lidergo gaitasunagatik eta hain mediatikoa den futbolaren munduan euskaraz era koherentean jokatzeagatik". "Agerraldi publikoetan euskara lehenesteko garaian sortzen diren zailtasunei aurre egiten jakin du eta eredu bat eskaini dio hiztun komunitateari", nabarmendu dute.