Donostiarrek erabiltzen dute batik bat Kontxako udako liburutegia

Erabiltzaileei dagokienez, haurrak eta helduak pareko agertzen dira. / UNANUE

Donostia Kultura, pozik abuztuaren 31era arte zabalik egongo den Eguzkitekak aurreneko hilabetean izan dituen emaitzekin

Duela hilabete bat, uztailaren 7an, inauguratu zen Eguzkiteka, Kontxako hondartzako liburutegia. Kontxa pasealekuaren azpiko espazioan kokatua dago, erlojuen parean, La Rotonda diskoteka egon zen lekuan. Donostia Kulturaren liburutegi sareko zerbitzu honek hainbat ezaugarri bereizi ditu irekiera ordutegia eta zerbitzuei dagokionez.

Donostia Kulturak ohar baten bidez adierazi duenez, "hilabete honetako balorazioa oso ona izan da, bai bertara hurbildu diren erabiltzaileen aldetik, baita liburuak hondartzara eraman dituzten irakurleen aldetik ere. Gure aldetik eskertzekoa da irakurleek azaldu duten begirunea eta portaera".

Bertaratutakoen heren bat kanpotarra izan da, gehienak turistak edo Donostiara egun pasa etorri den jendea. Beste multzo txikiago bat, Gipuzkoako herrietatik etorritakoek osatzen dute; eta gehiengoa donostiarrak izan dira.

Publikoaren adinari dagokionez, haurrak eta helduak pareko agertzen dira. Ipuinaren orduaren saioak arrakasta handia izaten ari dira haurren eta familien artean.

Eguraldiak gehiegi lagundu ez badu ere, 1.200dik gora erabiltzaile izan ditugu. Eta maileguan 300dik gora liburu utzi dira, egunean bertan itzuli beharrekoak. Ipuinaren orduari dagokionez, egunero 15-20 bat haur egoten da kontaketa jarraitzen.

Eguzkiteka egunero dago zabalik, astelehenetik igandera, goizeko 10:00etatik arratsaldeko 19:30era. Arratsaldero 17:00etan Lur Kortaren haurrentzako ipuin kontaketa saioa izaten da.

Publiko mota guztiei zuzendua dago, egunkariak eta aldizkariak bertan irakurtzen egoteko aukeraz gain, hondartzara maileguan eramateko aukera eskaintzen da, nahiz eta bazkide txartelik ez izan.

Eguzkitekarekin batera Donostia Kulturak badu beste udako liburutegi bat, Urgull mendiko Damen Baterian. Duela hogei urte sortu zen eta irakurketa gune interesgarri bat izaten jarraitzen du. Bi liburutegi hauek, Eguzkiteka eta Urgull mendiko liburutegia, abuztuaren 31ra arte egongo dira zabalik.

Temas

Euskera

Fotos

Vídeos