Bederatzi hautagai Donostiako Errege Magoei jantzi berriak egiteko

Datorren urtean jantzi berriak izango dituzte Donostiako Erregeek./LOBO ALTUNA
Datorren urtean jantzi berriak izango dituzte Donostiako Erregeek. / LOBO ALTUNA

Aukeratuak izan diren bederatzi diseinatzaileek maniki baten soinean aurkeztu beharko dituzten euren proposamenak irailaren 4an

Donostiako Errege Magoen arropak diseinatzeko lehiaketako bederatzi finalistak aukeratu dituzte. Cinthya Cubillo, Miriam Manterola, Amagoia Etxeberria, Cristina Uslé, Ane San José, Lierni Esnaola, Loreto Martín, Maider Alzaga eta Nuria Otazu dira finalistak, denak diseinatzaileak edo moda diseinuko-ikasleak.

Hurrengo urratsa irailaren 4an emango dute, diseinuak maniki baten soinean aurkeztu beharko baitituzte epaimahaiaren aurrean. Egun horretan bertan jakingo da nor den irabazlea. Diseinu irabazlearen egileak 4.000 euro jasoko ditu saritan, eta urtarrilaren 5eko Errege Magoen desfilerako behin betiko arropak diseinatzeaz arduratuko da.

Joan den urtarrilaren 27an 'Eraberritu itzazu Errege Magoak0 izeneko lehiaketa publikoa jarri zen abian, "Donostiako diseinua sustatu, garatu eta ikusgai egiteko" xedearekin. Sektorea sendotzera bideratutako ekimen guztiak barne hartzen dituen Donostia Moda Klusterraren 2017ko Ekintza-planaren zati da ekimena, Donostia Sustapenaren bidez. Ernesto Gasco alkateordeak adierazi bezala, «ekitaldi herrikoi eta tradizional dugun Errege Magoen desfilea aprobetxatu nahi izan dugu bertako diseinugileei beste aukera bat emateko, Errege Magoentzako diseinu berrituak sortu eta herritarron aurrean beren sorkuntzak aurkeztu ahal izan ditzaten».

Nahi izan duten diseinugile guztiek izan dute lehiaketan parte hartzeko aukera; bai profesionalek, eta bai moda-diseinuko ikasleek ere. Baldintza bakarra izan dute: Errege Magoen oinarrizko arropak eta tradizioa errespetatzea. Modaren sektorean eta hiriko desfilea antolatzen eskarmentua duten pertsonaz dago osatuta epaimahaia.

Proposamenak aztertu eta ebaluatzeko orduan kontuan izan dute, batetik, Errege Magoen neguko arropetarako egokiak diren ehun eta materialak erabiltzea eta, bestetik, iru estilismoetan sormena eta originaltasuna izatea eta berritzailea izatea. "Abangoardiaren eta klasikotasunaren arteko oreka mantentzea hiru figuretan" ere kontuan hartu duten aldagaia da.

Temas

Euskera

Fotos

Vídeos